Agriculture Department a thawktu ten tunlai thiamna ril zawk hmanga chak zawk leh tha zawka hnathawh dan tur zirna, ni thum chhung awh tur Basic Computer Training chu vawiin khan DAO Office Conference Hall Lunglei ah neih tan a ni.

Hawnna inkhawm tawi Lunglei DAO Pu Tlangtimawia kaihhruaiah, khuallian Pu David Liansanglura Additional DC Lunglei chuan Information and Technolgy hmanga hnathawh sawtna leh hriatna tih zau a pawimawh thu sawiin Agriculture Department a thawktute pawhin kuthnathawktute pui tura kuthna thawhna zawna an thiamnate an tangkaipui lehzual a duh thu a sawi a. Tunlai thiamna hmanga intat hriama ei leh bara Mizoram a intodelh theih nana thiamna pe chhuaktu ni zel turin kal khawm te a fuih bawk.

He cheme hi Mizoramah kum 2016 atang khan bul tan niin Aizawl leh Lungleiah Training Lab pawh din fel tawh a ni a, State Agriculture Portal, loneitu.nic.in siam niin hetah hian loneitute tana thil tangkai tur hrang hrang dah a ni a, loneitu engemawzatin an hmang tangkai tawh a. Hetiang thil atan hian Computer zirna, Department a thawktute hnenah pek kal mek niin an ni hian kuthnathawktute an zirtir leh chhawng dawn a ni.