Horticulture Department, Serchhip in Leng khuaa an hmalakna - Green House Cluster atanga Tomato an tharchhuahte chu Pi Sangchhin Chinzah, Serchhip District Bawrhsap chuan vawiin khan hralh chhuah turin a vailiam.

Green House Cluster atanga Tomato tharte thawnchhuahna huna khuallian, Pi Sangchhin Chinzah chuan Leng khua hi khawfai leh kangmei veng tha lawmman pakhatna dawng thei an ni a, an khua in hma a sawn zia leh, in vawn dan felfai tak chu fak tlak an nih zia a sawi a, Foreigner te pawhin an khua chu an la tlawh duh zel a beisei thu a sawi bawk. Tanpuina dawng tur chuan tanpui tlaka kan awm a ngai a ni tiin, Leng khuain tanpuina an dawn ang angte leh la dawn turte pawh tha taka hmang zel tura chahin, inkalpawhna kawngah hmalakna tur awm ang te pawh thuneitute hnena lo thlen sak a tum thu a sawi bawk. Khuallian hian Greenhouse neitute hnenah tomato an tharte an dahna tur plastic bawm 12 theuh a hlan a ni.

He hun ah hian Pi Pc Lalnghahsangi, Circle Horticulture Officer chuan Technical Report a pe a, he Greenhouse Cluster atan hian an mamawh hrang hrang, Community Water Tank, Evaporative Low Energy Cool Chamber leh thlam sakna tur pek an ni a. He Greenhouse Cluster hi MIDH 2017-18 hnuaia sak niin, ni 12.2.2019 khan sak zawh a ni. Greenhouse pakhat zau zawng hi 100 sqm zel niin, mi pakhatin Greenhouse pahnih an changa, farmer mi 10 tan Greenhouse hi siam sak niin, PMKSG atangin Greenhouse zawng zawng hi Drip System Irrigation siam sak vek a ni bawk.

Ni 20.3.2019 ah tomato phun tanin, phun atanga ni 71 naah a rah hmasa ber lawh a lo ni tawh a, ni 10.6.2019 khan 15 qtl lawh leh niin, hei hi Horticulture Fair, 2019 ah khan zawrh chhuah a lo ni tawh a. Vawiina Aizawl leh Serchhip Bazara zawrh chhuah tura District Bawrhsapin a vai liam tak zawng zawng hi 30 qtls chuang niin, Tomato tharchuah tawh zawng zawng hi 45 qtls vel a ni. Tomato thawn chhuahte hi MIDH hnuaia Post Harvest Management hnuaia Refregerated Van hmang a phurh chhuah a ni. 

He hun hi Pi M. Vanlalzami, District Horticulture Officer, Serchhip in a kaihruai a.  He hun hmanpuitu Pu M. Manthianga, Jt. Director, Horticulture Department chuan thu a sawi a, Pi Lucy Zaithangpuii, Horticulture Development Officer, Serchhip in lawmthu a sawi bawk.