Urban Development & Poverty Alleviation Department Lunglei buatsaihin vawiin khan Lunglei khawpui chhunga NGO hrang hrang hrang hruaituten  bawlhhlawh sawngbawl kawnga dan leh hrai, Solid Waste Management Rules 2016 zirhona an nei.

 He hun UD&PA Conference Hall, Convention Centre, Lungleia neihah hian Lunglei DUDO Pu Andrew Lalhruaia chuan SWM Rules 2016 zawm leh hemi ang a khawpui faina atana hmalak chu mitin tih makmawh a nih zia a sawi a. Supreme court hnuai ah National Green Tribunal (NGT) in min vil reng a ni a ti. 

He Rules chungchang leh a kaihhnawihte Pu Hmangaihzova Specialist IEC in Power Point Presentation hmangin kalkhawmte a hrilhfiah a,  khawpui faina dan hnuaiah hian khawpuia thuneitu chuan bawlhhlawh paih man khawnte, khawlai a bawlhhlawh paih, zunram thiar, chilchhak, ui ek tir leh a dang te pawisa chawi tir theih a siam a ngaih dan te, In tin in bawlhhlawh bawm hrang pathum hmang a bawlhhlawh thliar  a huam vek dan te zir ho a ni. 

NGT thupek angin heng dan hrang hrang te hi khua leh veng tinin an kalpui thuai a tul dawn thu leh zawm loh theih loh a nih dawn avanga inbuatsaih a tul tawh zia sawi lan niin NGO aiawha kalte pawh a theih ang ang a he Dan hman tur chungchang hi thehdarh tura sawm an ni nghal bawk a ni.