Mizoram Social Defence & Rehabilitation Board (MSD & RB) Social Welfare Department buatsaihin “Field Investigator for Drug Survey Amongst Minor Training” hawnna hun Aizawl SP Conference Hall, Aizawl-ah neih a ni a, Social Welfare Minister Dr K Beichhua chu Khuallian niin he hun hi a hmanpui.

Minister Dr K Beichhua chuan,” Ruih theih thil hman sual hi khawvel huap pawh a ram hrang hrangten an buaipui nasat ber pawl a ni a, rawlthar te zingah hian tih chhin ve chakna hi a hluar hle bawk niin a lang a ni,” a ti a,”A vawi khatna atan a Mizoram-ah rawlthar zinga ruihhlo hman sual zirchianna survey Social Welfare Department in an buatsaih hi a ropui hle a ni,” a ti bawk. Dr K Beichhua chuan,” Mizoram chhunga district zawng zawnga rawlthar kum 10 atanga 18 inkar bikah ruihhlo hman sual chungchang zir bingna hi a pawimawh hle dawn a, he survey report a kan hmuhchhuah leh zirchhuah atang hian hlawk zawk a hma lak dan tur kan ruahman dawn a ni” a ti.   

Social Welfare Department Director Pi Vanlalpianpuii pawh in Investigator training turte chu fuihin, Field Investigator pawimawhnate a tar lang a, inpekna thinlung nen a hnathawh a tul zia te sawiin, Field investigator te report chu ruihhlo dona kawng a hmanraw pawimawh tak anih tur thu a sawi bawk a ni. He training hawnna hun hi Pi Lalhlupuii, CEO, MSD&RB in a kaihruai a, Pu Debashis Mukherjee in zirtirna a pe a ni.

Drug Survey Amongst Minor hi Mizoram chhung district 8 a Middle School leh Higher Secondary school 124 ah kalpui tum niin mi 60 chuangin survey hna hi an thawk dawn a ni. He survey hian school bakah school chawlhsan rawlthar 1500 chuang a huam tel bawk dawn a ni. Mizoram Social Defence & Rehabilitation Board, Social Welfare Department chuan kum 2017 khan Mizoram chhunga ruihhlo  hman sual dan zirchianna “Baseline Survey on Extent & Pattern of Drug Use in Mizoram” tih a buatsaih a, he zirchhianna a a lan dan chuan ruihhlo in a tihbuai tam zawk te chu thalai, an tleiral chhuah hlima lo ti tan tawh te an ni. Survey report in a tar lan dan chuan kum 15 atangin meizial leh hnim chi (Solvent) ti an tam a, kum 19 an lo tlin meuh chuan damdawi ruih theih atangin inchui chi (Injecting) thleng an khawi ta thin a ni. “Drug survey amongst minor” hi rawlthar kum 10 leh 18 inkar, school naupang leh school chawlhsan zinga ruihhlo hman sual zirchianna tur a ni a, ruihhlo dona kawngah leh thalaite hnena hlawk zawk a zirtirna inpekna kawngah hmanraw tangkai tak ni tur a beisei a ni.