Lawngtlai District Bawrhsap Pi Shashanka Ala, IAS chuan vawiin khan Lawngtlaia hnuchham enkawlna hmun, Lairam Motherless Home (LMH) leh kum tling lo naupang humsual dai palh vanga dan bawhchhiate'n nun kawng dik an zawh theihna tura enkawl lailawkna hmun, Observation Home te tlawhin, an dinhmun a enfiah. 

Lawngtlai Bawrhsap hi Lawngtlai District Child Protection Officer (DCPO) Pi Mary Lalremruati leh District Information & Public Relations Officer (DIPRO) Pu C. Lalhruaitluanga te'n an tawiawm a. He'ng home-a naupangte dinhmun a enfiah bakah, an mamawhte a zir chiang a.  Home-a thawktute nen inkawm hona hun hmangin, hmasawnna tur kawng hrang hrang an sawi ho a ni.

Lawngtlai Bawrhsap chuan home-a thawkte leh a viltu District Child Protection Unit (DCPU) te hna thawh chu ropui a tih thu sawiin, retheihna avang leh ruihhlo avanga fate hlamchhiah leh enkawl theih loh awm thin chu a reh theih nan khua leh tui zawng zawngin mawh kan phur theuh a ni, a ti a. Naupang kum tling lo, humsual daia pawi khawih thin tam zawk chu nu leh pa te ngaihsak hlawh lo leh sikul pawh kal mumal lova vak mai mai thinte an nih thu sawiin, chumi a reh theih nan chuan naupangte anganwadi leh sikulah tha taka an kal theih nan inzirtira hma lak a tul a ni, a ti a. District Bawrhsap a nih angin chuti zawnga hma lak chu a tum tih a sawi bawk.

Lawngtlai DCPO chuan DCPU-in he'ng home-te an vil dan leh danin a phut anga naupangte hmakhua ngaia hna an thawh dan te Bawrhsap hi a hrilhfiah a. Tin, hnuchham enkawlnaa naupang awm, nu leh pa nei tawh lote miin fa atan an lak duh huna thil an kalpui dan te pawh Bawrhsap hi a hrilhfiah bawk.

He'ng fa lak lam buaipuitu (Specialised Adoption Agency) hi Lawngtlaiah hian pakhat awmin, Lairam Child Adoption Centre tih a ni a. He agency kal tlang hian kum 2013 atanga kumin May thla thleng khan India ram chhung atanga fa atana lak 12 leh ram pawn atanga an rawn lak 4 an awm tawh a ni.

Lairam Motherless Home hi Lairam Isua Krista Baptist Kohhran (LIKBK)-in a din leh enkawl a ni a. Juvenile Justice Act hnuaia chhinchhiah leh ziah luh (registered) home a ni. January ni 11, 1994-a din niin, kum 10 hnuai lam naupang 30 enkawl theihna hmun a ni a. Tunah hian thawktu 13 awm mekin, he'ng zinga 5 chuan a hmunah an awm chilh a, naupang hi hmeichhia 7 leh mipa 6, an vaiin 13 enkawl lai an nei. Naupangte hi kum 1 hnuai lam 4, kum 1-3 inkar 3, kum 3-5 inkar 2 leh kum 6-10 inkar 4 an ni a. Naupang 5 chuan Gov't Primary School-I, College Veng-ah sikul an kal a ni.

Observation Home hi kum 2016 khan din niin, tun thleng hian naupang 40 enkawl an ni tawh a. Tunah hian enkawl lai naupang 3 an awm mek a ni. Thawktu hi 10 awmin, naupang dan bawhchhia observation home-a enkawlte hi nun kawng dik an zawh theih nan thu leh thil tiha lo kaihhhruai te, lehkha lo zirtir te, kut themthiamna hmanga ei zawng thei tura lo zirtir te an ti thin a. Thla tin vawi 1 emaw a tul dan azirin emaw doctor-te'n tlawhin, an hriselna dinhmun enfiah thin a ni bawk. Observation Home-a naupang enkawlte hi thla 4 chhung an dinhmun en thlithlai tur a ni a, a tul dan azirin he hun hi thla 2 thleng pawh sei theih niin, Home-a an awm chhung hi a rei berah thla 6 a ni thin. Heta naupang enkawlte hi inkaihhruaina fel tak hnuaiah hun bi nei thlapa thil tihpui thin an ni a. Intihhlimna tur hrang hrang ngaihtuahsak an nih bakah, music class te neihpui thin an ni a, picnic te pawh neihpui thin an ni.

Sawrkarin a enkawl emaw sawrkar lovin an enkawl emaw pawh ni se, DCPU chuan he'ng naupang enkawlna hmunte hi vilin, record hrang hrang an vawng vek a. Home tin hian children's committee leh home management committee nei vekin, thla 3 danah District Level Inspection Committee chuan home-te hi a endik thin a ni.