3965/2023-2024

Aizawl, 26.02.2024: Vice President Pu Jagdeep Dhankhar chuan vawiin khan Mizoram a rawn tlawh a. MZU ah Convocation programme a hmanpui zawhin 9th Mizoram Legislative Assembly thutkhawm tum hnihna – Budget Session neih mek chu telpuiin member-te hmaah thu a sawi.

Vice President chuan MLA zawng zawng deuh thaw House-ah an thu chu fakawm a tih thu sawiin, state dang legislature leh parliament ah pawh Mizoram in attendance tha tak an nei chu a sawi zui zel tur a nih thu a sawi a. Mizoram a Assembly Session lo kalpui tawh dan te a lo en thu leh, felfai leh zahawm taka an thu rel dan chu lawmawm a tih thu sawiin, MLA te chu midang tana entawntlaka an awm zui zel a beisei thu a sawi bawk. MLA zingah hmeichhia pathum lai mai Mizoramin a nei chu sawrkarna leh ram hmasawnna in a ken tel nia a hriat thu sawiin Vice President chuan lawmawm a ti a. India sawrkar in inrelbawlnaah hmeichhiate tan zau zawka kawng hawng tura hma hrang hrang a lak dante leh chu chuan rah tha zawk a chhuah ngei a rin thu a sawi bawk.

Vice President chuan India ramin nasa taka hma a sawn thu sawiin, he hmasawnna atan hian hmarchhak state te – Mizoram telin – an pawimawh hle thu a sawi a. Sawrkar laipui pawhin hmarchhak state te hmasawnna chu ngaipawimawh in, a enkawltu tur department hran tawp siam a nih thu te, tun kum sawm chhung khan hmasawnna ruhrel pawimawh tak tak North Eastern Council leh sum hnar dang kaltlanga din a nih dan te a sawi a. Sawrkarin thalaite hmakhua ngaiin ruahmanna a siam a, hma a lak avangin tun hun anga thalaite’n an tuina leh an chak zawngte bawhzui a an hlawhtlin theihna ang hun tha hi a la awmlo a ni a ti bawk.

Mizoram in tourism lamah te, horticulture ah leh kawng dang danga sum dehchhuaha nasa zawka hmasawn tura theihna awm chu vanneihthlak a tih thu a sawi a. Vawiina House a member thukhawm te chu heng theihna te hi a tangkai thei ang bera hman a nih nan a mi pawimawh ber an nih thu a sawi a. Parliament Building thar hmuhpui a New Delhi kal turin a samw hlawm bawk a ni.

He hunah hian Chief Minister Pu Lalduhoma pawhin Vice President in Mizoram a tlawh chu lawmawm a tih thu a sawi a. State hmasawnna atana theihtawp chhuah a nih tur sawiin, sawrkar laipui tawiawm naah thui tak a innghah tur thu a sawi bawk.

Vice President hian Assembly House a hun a hman zawh hian Raj Bhavan ah Governor Dr. Hari Babu Kambhampati buatsaih chaw chhun a ei zawh hnu in New Delhi lam a pan leh a ni.