Vawiin chawhma dar 10:00  ah tanin Circuit House Conference Hall, Lunglei-ah Vigilance and Monitoring Committee Meeting neih a ni. He meeting hi Pu C.L. Ruala, MP(Lok Sabha) leh Pu Lalhmingliana, MP (Rajya Sabha)-ten an kaihruai a ni. Pu C.L. Ruala, MP(LS) chuan thu sawiin Vigilance and Monitoring Committee Meeting Lunglei District-a neih ani thei chu lawmawm a tih thu a sawi. Central atang leh State sorkar atanga development sum hnathawh nana lokal thin hi dik leh tha thei ang bera hman anih theih nan MP-te hova he meeting neih thin anih thu a sawi. AOC leh Hrangchalkawn inkar kawng chhe lutuk pawh siamtha turin BRTF kuta awm tawh lovin PWD Highway  Chief  Engineer kuta dah anih tawh thu a sawilang bawk.

He meeting hian kum 2009-2010 chhunga MGNREGA hnuaia sum nuai 3968.25 senga hnathawh tawh a thlir a, a tlangpui thuin tha thawkhat mahse thenkhat lai kalpui that zawk dan tur sawiho a ni. Chutiang bawkin kum 2009-2010 chhunga IAY sum nuai 303.748 senga hna lo thawh tawh dan sawiho a ni bawk. Kum 2009-2010 chhunga SGSY sum nuai 69.779 hman dan te, IWDP hnuaia hnathawh tawh dan te, PMGSY hnuaia hna thawh tawh dan te leh NSAP hnuaia hnathawh tawh dan zawng zawng chipchiar taka thlirna leh sawihonate neih a ni. He meeting-ah hian bialtu MLA leh Minister ni bawk Pu Zodintluanga leh Pu NK Chakma, Pu S.Laldingliana, Parliamentary Secretary, Pu Joseph Lalhimpuia, Vice Chairman, HPC, Pu John Siamkunga te telin official lamah Pi M.Zohmingthangi, IAS, Lunglei Bawrhsap hovin he meeting-a member-te an tel tha hle a ni.