Govt. Aizawl West College chuan Vigilance Awareness Week denchhinin I & PR Conference Hall ah vawiin khan Inter-departmental Debate an buatsaih a. Pu Lalhmachhuana ITS, Secretary, ICT Govt. of Mizoram chu khuallian a ni.
Pu Lalhmachhuana chuan fuihna thu sawiin zirlaite chu nakin lawka ram hruaitu tur an la nih dawn avangin tun atanga sorkar inrelbawlna kawng hrang hrang an ngaihven leh an hriatthiam a tul a. Lehkhazir kawngah theihtawp chhuah reng chungin ram chhung leh ram pawna sorkar chetvel dante leh hnathawh dante hriat tum turin a chah a ni.
He debate ah hian college a department pariat zinga paruk atangin inelna an nei a. Debate thupui atan ‘Mizoram sorkar hian Vigilance lamah hma a la tha tawk a ni’ tih a ni a. He debate hi NEDFi Aizawl Branch leh Aizawl West College a Internal Quality Assurance Cell (IQAC) te buatsaih a ni.
