Vawiin khan Thuampui, Helipad-ah Vijay Diwas lawmna ni ropui taka hman niin UD &PA Minister Pu Zodintluanga’n a hmanpui a. Sipai bang te hamthatna lam hawi zawnga inthawkhawmna (re-union) neih nghal a ni bawk.
Pu Zodintluanga chuan kum 1971 a Indo-Pak indona a India ramin hnehna a chan hriatrengna ni Vijay Diwas-ah hian indona hrang hranga sipai nun hlan ta te zahna chibai a buk a, sipai tanglai te, sipai pension (ex servicemen) te leh indona avanga an thihsan, an nupui fanaute a ngaihtuah takzet thu a sawi a ni. Minister chuan indopui pahnihna World War II veterans te tan kum 1995, September thla atanga sorkarin chhawmdawlna sum a pek thin chu tih pun a nih tur thu te, sipai bang te hnenah cheng 1200 leh indona avanga pasal sun (war widows) te hnenah cheng 1000 pek chu Chief Minister in a remtih tawh thu a tarlang a. Sainik School din a nih theihna tura sorkar in hma chak taka a lak thu pawh sawiin contractor tur thlan fel a ni tawh, a ti. Shillong -a War Memorial, Assam Regimental Centre cheithatna atan cheng nuai 10 chu Minister Pu Zodintluanga hian sipai thuneitute hnenah a hlan nghal bawk a ni.
Assam Regimental Centre, Shillong Commandant Brig Ved Prakash pawhin kum 2012 chu sipai bangte kum “Year of Veterans” a puan a nih thu sawiin sipai bang te hamthatna hrang hrang he thupui kaihhruaina ang hian duan chhuah zel a ni, a ti a. Ex-servicemen Contributory Health Scheme (EVHS) siam a nih thu leh tun dinhmunah Mizoramah sipai bang te vua leh vang he scheme-a inziak lut mi 1214 an awm, a ti a. A la inziak lut ve lo mi engemawzat la awm te pawh hamthatna an dawn theih nan inziak lut ve ngei turin a sawm a ni. B
Inkhawm hi Adm Commandant Col. Sanjay Pandey-a’n kaihruaiin Mizoram Ex-servicemen Leaque President Col (Rtd) LC Sailo leh Sainik Welfare &Resettlement Director ten thu an sawi a. Mizoram Youth Commission Chairman Pu Hmingdailova Khiangte leh Lt Col ZS Zuala, Aizawl South II bialtu MLA te pawhin he hun hi an hmang a ni.
