Vawiin khan Kulikawn School Complex-ah Volleyball/ Basketball Court Sports Minister Pu Zodintluanga’n a hawng.

Pu Zodintluanga chuan khawtlang hruaitu taima, remhria leh khawtlang tana thuk taka inpe kan nei hi Mizoram vanneihna a ni, a ti. Basketball leh Volleyball kheilh theihna court tha tak hawn a ni chu lawmawm a tih thu sawiin, khawtlang hruaitu te thahnemngaihna a fak a. Thalai tam tak boral tur chhanhima kawng dik an zawhna tur hmanraw tangkai a nih a beisei thu leh he hmun atang hian Mizo thalai engemawzat infiamna kawngah an dingchhuak ngei dawn nia a hriat thu a sawi a ni. Olympic 2016 a Mizo te hming a lan ve ngei theihna tura sorkar hmathlir, Vision 2016 pawh sawi nawnin sorkarin thalaite hmakhua ngaia remchanna tam tak a siam sak hi hmang tangkaia Mizoram leh Mizo te tihmingthatu ni ngei turin infiammi te a chah a ni.

Aizawl South II bialtu MLA Lt Col ZS Zuala pawhin thu sawiin infiamna hi ruihhlo dona tangkai, taksa insawizawina tha leh mihring te hriselna atana thil pawimawh a ni, a ti a. Vawiina Kulikawn vengin infiamna tualzawl, volleyball leh basketball khelh theihna court tha tak an nei ta chu an veng mai nilo, Mizoram tan thil hlu (asset) a tling a ni, a ti.

Kulikawn Branch YMA Volleyball/Basketball court hi 2009 kum tir lam khan UD&PA sum cheng 4,50,000 a sak tan a ni a. Khawtlangin nasa taka tan la in, hnatlang vawi engemawzat neih a ni a. Hnatlang remchang lo te pawhin sum leh pai bakah balu leh rawra te an thawh a. D-3 Business Enterprise ten cheng 40,000 sengin rawng an hnawihsak bawk a ni. Sum senso hi a vaiin cheng nuai 16 vel nia chhut a ni.

Hawnna inkhawm hi Kulikawn Branch YMA President Pu Laldawngliana’n kaihruaiin Vice President Pu Lalchawiliana’n report a pe a, Adviser KYMA Pu Ramhlunsanga chuan lawmthu sawiin hawnna inkhawm hi tihtawp a ni.