3132/2023-2024

Aizawl, 20.12.2023: Vawiin chawhma khan sawrkar laipui tirhin Viksit Bharat Sankalp Yatra hmalakna atana Prabhari (in-charge) a ruat Pi V. Hekali Zhimomi, Addl. Secretary, Ministry of Health & Family Welfare, Government of India chuan Secretariat Conference Hall No.2, MINECO ah he hmalakna in a kaihhnawih department hrang hrang hotute nen meeting a neihpui.

He meeting-ah hian Pi V. Hekali Zhimomi chuan Viksit Bharat Sankalp Yatra ruahman a nih chhan a sawifiah a. Eizawnna kawngah te, hriselna lam te, sum khawl leh dehchhuahna kawng hrang hrangah sawrkar laipui chuan department hrang hrang kaltlangin mipui tan hamthatna scheme chi hrang hrangte a kalpui mek a. Tangkaipui tam tak an awm laiin hmang tangkai thei leh mamawh ve ngawih ngawih, inhrilhhriatna thatloh avanga an mamawh tak scheme a awm tih pawh hrelo an awm avangin he Viksit Bharat Sankalp Yatra hi kalpui a nih tak thu a sawi a. Inhrilhhriatna ngawrh thei ang bera kalpui turin India state leh Union Territory tinah IEC (Information, Education & Communication) Van tir in, hun tiam chhungin a outreach programme tha taka kalpui a nih tur thu a sawi a. A bik takin hmun kilkhawr zawk te ngai pawimawh turin leh, tribal mi te tana sawrkar laipuiin a ngaihpawimawh zual bik zinga tel - Eklavya Model Residential School enrolment tam zawk neih te, scholarship scheme te leh Van Dhan Vikas Kendra te chu inhrilhhriat tam tha a tih thu a sawi bawk.

Meeting-ah hian Pu Lalmalsawma Pachuau, Secretary, Planning & Programme Implementation department leh VBSY State Nodal Officer ni bawk chuan IEC van te hi ni 16, December 2023 (Inrinni) khan vailiam a nih tawh thu leh district hrang hrangah Yatra hi kalpui chhoh mek a nih thu a sawi a. Department tin te mawhphurhna leh hmalak tur la awm chungchangah thawhhona tha tak nen he scheme hi tihhlawhtling ngei tura hmalak a nih tur thu a sawi.

Vawiin meeting ah hian Agriculture, Rural Development, Social Welfare, Tribal Affairs & Women & Child Development, UD&PA, PHED, ICT, H&FW, Cooperation, School Education, H&TE, LAD, LR&S, I&PR, Fisheries, AH&Vety, LESDE department atangin leh MzSRLM te, Lead bank atang te in department hotute an kalkhawm a ni.

Viksit Bharat Sankalp Yatra hi inthlan avangin Mizoram, Chhattisgarh, Madhya Pradesh, Rajasthan leh Telangana te chu MLA inthlan avangin 16.12.2023 khan kalpui tan a ni a. State leh UT dang zawngah chuan 15.11.2023 atang khan kalpui tan a ni a. January ni 26, 2024 thleng kalpui tur a ni a. Hmalakna te hi online ah sawrkar laipui hriat turin update zel a ni. Aizawl district ah chuan ni 18.12.2023 atang khan outreach programme hi bultan niin, Sesawng, Hualngohmun, Melriat, Lungleng, Kelsih, Falkawn, Thingsul,Seling, Sihphir, Sairang, etc. ah programme hi kalpui tawh a ni.