No.2867/2021-2022
Aizawl the 3rd November, 2021 : Vawiin khan The Mizoram (Village Councils) Bill, 2021 Drafting Committee chu an Chairman Pu Zothanmawia, LAD Secretary hovin SAD Conference Hall, MINECO-ah an thukhawm.

Mizorama Village Council inkaihhruaina dan hman lai mek The Lushai Hills District (Village Councils) Act, 1953 hi a siamna a rei tawh avangin tunlai mila her rem leh siamthat tul tiin LAD Minister hova meeting chuan siamthat ni se tiin a lo rawt tawh a. He meeting thurel bawhzui hian Drafting Committee din zui a ni a. Village Council inkaihhruaina dan hman meka siam danglam ngai te zirchiang a, paih tul nia lang te paih a, belh ngai te belh turin he Committee hi din a ni. Drafting Committee chuan The Mizoram (Village Councils) Bill, 2021 tia dan thar an duan chhin (draft) chu vawi tam tak a thlir tawh a. Vawiin meeting-ah hian a hmawrbawkna an hnaih tawh thu Chairman Pu Zothanmawia chuan a sawi a ni.

Drafting Committee chuan The Mizoram (Village Councils) Bill, 2021 draft hi a buatsaih fel hnuah sawrkar pawmpui turin thehluh chhunzawm a ni dawn a. A tul angin Cabinet ah leh State Assembly ngaihtuah turin a kal chho dawn a ni.