No.2868/2021-2022
Aizawl the 3rd November, 2021 : Hnahthial District Executive Force (DEF) bultumin Hnahthial District chhunga Raltlan awmna khua Thingsai, Bualpui 'H'; Tarpho, Khawhri, Ngharchhip, New Ngharchhip leh Cherhlun-ah te Raltlan te pualin Legal Awareness Campaign neih a ni.

Hnahthial SP Pu Lalbiakkila chuan Dt 24th September, 2021-a DC Conference Hall, Hnahthial a 'Meeting on the issue of the Refugees', thurel bawhzuina kal zelah Hnahthial District chhunga khaw hrang hrang a Refugee Camp-a khawsa mek raltlan te India ram dan leh hrai leh thupek te, a bik takin IPC, CrPC, MV Act leh Hmeichhiate leh naupangte humhalhna dan hrilh hriatna leh zirtirna (Legal Awareness Campaign) New Ngharchhip, Ngharchhip, Bualpui H, Cherhlun, Thingsai, Tarpho leh Khawhri khua a Refugee Camp-ah te Hnahthial District Police ten an buatsaih tih a sawi a.

He hunah hian Hnahthial District Police te chu Team hnihah an in then a. Pu Bijoy Gurung, MPS Addl. SP Hnahthial leh Pu Vanlalbiaka Joute, MPS SDPO Hnahthial ten heng Team hnih te hi hovin raltlan te hnenah India rama an awm chhung hian thlamuang taka awm tur leh India dan leh Sawrkar thupek te zawm theuh turin an hrilh a ni. Hnahthial Town area chhunga raltlan te zingah an camp-ah te kal chilhin Dt 4.10.2021 khan Legal Awareness hi an lo nei tawh bawk a ni. Heng raltlante zingah hian face mask leh sanitizer te a tul anga sem nghal zel a ni bawk.

Hnahthial Bawrhsap office chhinchhiah danin vawiin khan Hnahthial District chhungah Myanmar buaina avanga mahni sahimna zawng luh belh mi 4 an awm a, an ram lama kir leh mi 43 an awm bawk. Hnahthial District chhungah Myanmar raltlan mi 2,310 an awm mek a, an zingah hian chhungkaw 418 an tel a ni. Khaw hrang hrang 12-ah raltlan te an lut a, Thingsaiah 903; Cherhlunah 185; Bualpui 'H'-ah 155; Ngharchhip-ah 169; New Ngharchhip-ah 456; Tarpho-ah 67; South Chawngtui-ah 25; Khawhri-ah 62; Tuipui 'D'-ah 35, South Vanlaiphai-ah 8; Aithur-ah 14; Leite-ah 11 leh Hnahthial-ah 228 an awm mek a ni.