3938/2024-2025

Dated Hnahthial, the 24th January, 2025: Vawiin khan Hnahthial DC Meeting Hall-ah District Election Officer, Pi Rita Lalnunmawii Pachuau, Hnahthial Bawrhsap ni bawk kaihhruaiin Village Council Inthlanpui lo awm tur atana Hnahthial District Election Observer, Pi Lalhruaitluangi, Deputy Secretary, Land Revenue & Settlement chuan VC inthlanna atana Hnahthial District chhunga Nodal Officers leh Sector Officers te chu a thutkhawmpui.

Election Observer, Pi Lalhruaitluangi chuan State Election Commission (SEC) thupek angin inthlanna neih hma a inpuahchahna kalpui dan a rawn thlithlai vawi khatna tur a ni a ti a. Inthlan niah hian vote thlaknaah buaina a awm loh tlangpui thu sawiin State Election Commission pawn a ngaih pawimawh ber leh buaina awm tam thin na ber chu vote tla zat chhiar (counting) ah hian a nih thu a sawi a. VC inthlannaah phei chuan vote inthlauhna hi a tam tham thin loh avang hian vote chhiar hi uluk a tul lehzual hle a ni tiin chumi buaina a awm loh nan chuan Counting supervisor leh officials a hman tur pawh ruihtheihthil laka fihlim ni thei hram se a duh thu a sawi a. SEC in a ngaih pawimawh zual hrang hrang te sawiin inthlanna atana Hnahthial District chhunga inpuahchah dan zawhna leh chhanna hun Nodal officers te nen a nei nghal a ni. 

Election Officer, Pi Esther Leihang chuan Election Observer-in a hriat duh zualpui, Model Code of Conduct zawm that a nih leh nih loh te, ballot paper a felfai leh fai loh te leh complain lut lo chinfel dan tur te chu chhangin tun dinhmunah chuan election chungchangah buaina sawi tur a awm loh thu a sawi.

Inthlan ni a dan zawm that a nih theih nan a security inbuatsaih dan chu SP, Pu Shivam Siddharth hnen atanga ngaihthlak niin security tan a ruahmanna pawh felfai taka siam a nih tawh thu a sawi a ni.

Tun VC inthlan hi thla leh, February ni 12-ah neih tur niin Ballot box hmanga kalpui tur a ni a. Kutzungpui nem (thumb impression) hmanga vote thlak chu theih tawh dawn lohvin Cross Arrow Mark stamp ngei hmang chauhvin vote hi thlak theih a ni tawh dawn a. Vote chhiar that dawn chuan District Election Officer phalna lak phawt a ngai dawn bawk. Tun VC Inthlan lo awm turah hian None of the Above (NOTA) kha a awm dawn lo bawk a ni.

Thutkhawmnaah hian Election Nodal Officers - Pu Zothanmawia Khiangte, Addl DC; Pu HD Lalpekmawia, Project Director, DRDO; Pi Esther Leihang, SDO (Sadar); Pu Hmingthanzuala, DUDO; Pu R. Vanlalruata, SDC; Addl SP aiawh, Pu Zonghinga, SDPO; Pu F. Lalrinfela, DIPRO; Pu Lalrempuia, Superintendent leh Pu John Hualhmingthanga, UDC te chu an tel a. Heng bakah hian Sector Officers - Dr. C. Sanghluna, DAH&VO, AH&Vety Dept; Pu George Lalnuntluanga, DFDO, Fisheries Department; Pu R. Lalngaihawma, Asst. Professor, Govt. Hnahthial College (GHC) leh Pu David Laltanpuia Hmar, Asst Professor, GHC te an tel a ni.