State Election Commission kaihhruaina hnuaiah vawiin khan Local Administration Department (LAD), UD&PA Department leh DC Office Aizawl District aiawhte chuan State Election Commissioner Pisa-ah nakum a Village Council leh Local Council inthlan lo awm tur chungchangah thutkhawmna an nei a. Meeting hi State Election Commissioner Pu C. Ropianga’n a kaihruai a ni.

State Election Commissioner chuan V/C Electoral Roll a hun taka chhuah anih theih nan V/C hawn thar chungchangah Sorkar chu January ni 5 aia tlai lovah thutlukna siam ngei turin a ngen a. Meeting ah hian Aizawl, Lunglei, Serchhip, Champhai, Mamit leh Kolasib District a DLAO ten V/C Electoral Roll siam hna an kalpui dan leh tluang taka an zawhfel thu an sawi a. LAD Director chuan V/C Electoral Roll chhut hna kalpui mek anih thu leh a hun taka Roll hi an tarchhuah tur thu meeting ah hian a sawi a. Aizawl District Additional DC pawhin Local Council Electoral Roll siam hna peihfel tep anih thu a report bawk a ni.

Meeting-ah hian Village Council leh Local Council inthlanna lo awm tur atana sum mamawh zat tur uluk leh ngun takin an sawiho a. Pu C. Ropianga chuan inthlanna atana sum mamawh zat chu Sorkar dinhmun hre reng chhunga siam a pawimawh thu sawiin Sum chu a renchem thei ang bera hman a tul thu meeting ah hian a tarlang a ni. Model Code of Conduct hman dan chungchang meeting a hian sawiho a ni bawk.