C. Lalduhawma (L) s/o C. Lalpara, Bethlehem Vengthlang chu Nation Bravery Award 2011 dawng turin Indian Council for Child Welfare, New Delhi chuan a thlang. Chawimawina hi kumthar Republic Day lawmna New Delhi-ah Prime Minister in a hlan dawn a ni.

C. Lalduhawma hi Pu C. Lalpara leh Pi Lalrintluangi te fa tlum leh fapa mal nei turin ni 7 March, 1995 khan Bethlehem Vengthlang, Aizawl-ah a lo piang a. Naupang thuawih thei leh lehkha thiam thei tak niin, a zirlaiah fail a nei ngai lo. A boral lai hian St. Joseph Higher Secondary School-ah Class XII a zir mek a ni.

Ni 2 April 2011 (Inrinni) hian a thiante, a thuihhruaite nen ram kalin an lo haw lam pang chu Chite luia Bethlehem Vengthlang leh Zemabawk veng inkalpawhna tura Chite lei (Bridge) an dawhna tur foundation atan an lei laihkhuara tui tling, thuk tak, feet 26 bial vel, feet 20 vela thuk ah inbualin an cheng a. A thuihhruaite zinga mi P.C. Laltlanhlua (Patea) kum 11, s/o P.C. Vanlalnghaka chu an inbualna ah chuan a tla palh ta hlauh mai a. A thianpa chhan tum chuan tuiah zuangthla nghalin a thianpa chetsualna lamah chuan a hleuh phei ta nghal a. A thianpa hi tui atang chuan a chhanchhuak a. Amaherawhchu, a chhanchhuahna lamah hian C. Lalduhawma hi a chauh em avangin talbuaiin a chesual ve ta hlauh mai a. An bul hnaiah hian puitling an awm hnaih loh avangin a thian dangte chuan an hmuh remchan ang ang mauphel (phelsep) vawn tur an pek pawh man thei tawh lovin tuiah chuan a pil hlen ta a ni. Tichuan, a thianpa nun a chhanna lamah vanduaithlak takin a boral ta hlauh a ni.