Vawiin hian Lawngtlai DC Conference Hall ah, kan hma maia Lai Autonomous District Council MDC Election a hman tur Electoral Roll buaipuinaa mawhphur tura State Election Commission in a ruat, Village Level Officer te tan hnathawh dan tur inhrilhhriatna (Training) buatsaih a ni a, chu Electoral Roll felfai nei tur tihtur pawimawhte zirtir an ni.

He hunah hian District Election Officer, Pu J. Hmingthanmawia Lawngtlai Bawrhsap ni bawk chuan, Electoral Roll chu dik leh rintlak, rinhlelhna tur engmah awm lo a nih a tul a, Electoral Roll dik leh fel neih a nih theih nan Village Level Officer ten theihtawp chhuahin, dik takin engkim an ti thlap tur a ni a ti. LADC inthlanna danin a sawi angin MDC Electoral Roll atan hian MLA Electoral Roll thar ber chu Draft Roll atan hman tur a ni a, hemi atang hian Non-Tribal, mitthi tawh leh pem tawh te chu paih theih an ni dawn a, inthun belh leh hmundang a insawn ang chi te tihtheih a ni dawn lo thung a ni a ti.

Kumin kumtawp lama Lai Autonomous District Council inthlanna lo awm tur atan hian kawng hrang hrangin inbuatsaihna neih chhoh mek zel a ni a, Village Level Officer vawiina training neite hian LADC MDC Election Draft Roll thenfai hna hi khawtinah an thawk chhunzawm nghal dawn a ni.