Aizawl - Mamit NH44A laih mek leh kawng chhia chungchang ngaihtuahin vawiin khan Mamit DC Conference Hall-ah Deputy Commissioner Pi Lalbiaksangi hovin sawiho a ni.

Pi Lalbiaksangi chuan khaw kawng a chhiat avanga eirawngbawlna gas leh buhfai phurtu motor lian an tan fo avang leh a chetsual thin avangin district in harsatna a tawh dan sawiin hmalak dan tur sawiho tura meeting koh anih tur thu a sawi a. Pu Zoramliana, E.E. PWD(NHD-I) chuan kawnglaih mek a hnathawh chin te sawiin Dampui ngaw chhunga kawngpui laihna atan Forest Clearance neih a la nih loh thu a tarlang tel a ni.

Meeting-ah hian eirawngbawlna gas leh buhfai phur motor lian tluang taka a luh theih nan kawngchhe zual lai siamtha turin contractor ten hma lo la se ti a rel a ni. Gayatri Project Ltd. aiawh Sudarshan Reddy, site incharge chuan kawng thuam that hna hi September 1st,2015 atanga tan anih dawn thu a sawi a ni.

Hei bakah hian Airtel company in 4G hruiphum nana kawng an laih chhiat khuh that loh avanga chetsualna thleng thin chu siamthat anih dan tur ngaihtuah thuai ni se ti a sawiho a ni bawk.

Aizawl-Mamit NH44A kawnglaih mek hian Lengpui-New Eden thleng huamin 103.618km a thui a ni a, Rs.615.69 vbc senna tur a ruahman a ni. Tunah hian Rs.174 vbc contractor hnenah pekchhuah tawh a ni a. Hna hi December 2011 a thawh tan niin July 2017 a zawh tura ruahman a ni.

Vawiin meeting-ah hian kawnglaitu Gayatri Project Ltd.aiawh,PWD National Highway Division-I E.E leh S.D.O, district a sorkar official te, khawtlang hruaitute, MJA leh Mizofed aiawh te an tel a ni.