Vawiin khan Sports Minister Pu Zodintluanga hovin a office chamber-ah Sports & Youth Services Department coach te nen Olympic 2016 Rio, South America a neih tura Mizo thalai tam ber an tel theihna tura Mizoram sorkarin Vision 2016 a neih tihhlawhtlin dan tur leh hmalakna an thlir ho.

He meeting-ah hian Mizoram khaw hrang hranga Mizo naupang khawvel huap pawha talent nei tha te Aizawla awm thei si lo te an awm a nih chuan, chung mite chu a rang thei ang bera dapchhuah tum ni se. Chuti ang mi an awm a nih chuan Aizawla an awm theih dan tur a awm leh awm loh ngaihtuahho leh turin an rel.

He meeting-ah hian Sports Minister Pu Zodintluanga chuan Olympic 2016-ah hian India ram aiawhin Mizo naupang a tam thei ang ber tel thei tura inbuatsaih a tul a, hei hi a hlawhtlin nan chuan coach te inpektharna leh tumruhna a pawimawh a, taima takin talent identification nei a, a bika hrual tur kan zawn chhuah hi a tul a. Tunlaiah phei chuan khawpui fa ai mahin thingtlangah naupang talent nei tha tak tak an tam a, heng te hi kan zawnchhuah a an tan remchang kan siamsak hi a pawimawh hle a ni, a ti. A sawi zelnaah Minister chuan Olympic a tel tura inbuatsaihnaah hian Sports association tam takin naupang an thlang fel tawh chu lawmawm a ti a, la thlang fel lo association te pawhin naupang thlanfel thuai an nih theih nana chak taka hma lak a hun tawh a, discipline thenkhat selection la tifel lo pawhin a rang thei ang bera tihfel ni se, a ti bawk a ni.

Vision 2016 atan hian sports discipline 9 thlan a ni a, chu'ngte chu : - 1) Archery 2) Boxing 3) Badminton 4) Hockey 5) Shooting 6) Weight lifting 7) Table Tennis 8) Taekwondo 9) Judo.

Vision 2016 hmalakna chhunzawm zel nan 10.6.2013, 1:00 pm-ah Sports Minister office chamber-ah neih leh tura tih a ni.