Mizoram hmun hrang hranga NLUP kal zel enfiaha zin mek NLUP Media Cell chuan nimin khan Kolasib District khaw 3 - Bilkhawthlir, Chemphai leh N. Chawnpui - ah NLUP dawngtute leh Line Department hrang hrang hmalakna a hmunah an tlawh.

Bilkhawthlir North ten NLUP State Level Award lawmman 3-na Rs.1,50,000/- an dawn hmanga kuthnathawktute hman tangkai tur Bazar Shed (feet 60-a sei, feet 15-a zau) an sak mek leh Waiting Shed an sak zawh tawh te chu khawtlang hruaitute nen an en ho a ni.

Kolasib District Fisheries Development Officer Pu C.Laldawngliana chuan NLUP Media Cell te tawiawmin he district chhunga sangha dil siamtute chuan nasa takin hlawhtlinna an tel mek thu a sawi a. Chemphai leh North Chawnpui khuaa Sangha dil siamtute pawhin kumkhatah cheng nuai chuang sangha an hralh tan tawh thu te, an phurzia leh sorkar chunga an lawm thu te NLUP Media Cell te hi an lo hrilh a ni.

Media Cell te hi Chief Media Officer Pu David L. Thangliana hovin naktuk June ni 6-ah Mamit District lam an pan leh dawn.