Vawiin Valentine’s Day hian ‘Show Love, Show Blood’tih thupui hmangin tlawmngaihna changkang tia sawi, midangte tana malsawmna ni tura Voluntary Blood Donation Camp 2019 ,Dawrpui Multipurpose Centrea neih chu Health Minister Dr.R Lalthangliana’n a hmanpui.
Mahni tana hlawk lo,ngaihtuahna leh sum senna,midangte hmangaih avanga penchhuak ngama, damna tura thisen hlu tak pek runpui neih ani chu a hlu in a lawmawm a, India ram State ah pawh hmingchherna ngaihsanawm a nih thu Dr.R Lalthangliana, Voluntary Blood Donation Camp hawnnaa khuallian chuan sawiin mamawhte tan thisen pe turin tute nge lo kal ang tih hriat lawk ni bawk silo,chutihlaiin mi tlawmngaite’n chawhma lamah mi za chuangin thisen an pe tawh leh pek tuma kalkhawm thalai thahnem tak hmel hmuh tur a awm avangin lawmthu a sawi a.’Mizo nih hi a nuam a, hetiang ngaihtuah tu pawl ho kan nei hi a vanneihthlak ani’a ti.
Kum 2010 atanga an lo buatsaih tawh Valentine’s Day puala a thlawna thisen pek hi vawiin hi a tawpna ni lovin, a bul tanna leh hemi kawnga hmasawnna lo ni chho zel se tiin Sorkar Budget ah pawh Blood Bank hmasawnna awm zel tura beisei anih thu a sawi a,kumin kumtir Cabinet thukhawm pawhin Sorkar damdawi In ah chuan Blood Processing leh a kaihhnawih lamah fee lak loh tura rel anih thu leh Sorkar kum thar lamah chuan kalphung tha zawk ngaihtuah zel tum anih thu a sawi ani.
Pu C Lalnunnema,President AVBD kaihhruai vawiin programme ah hian Pu Lalrinfela,Joint Secretary AVBD hnen atangin report ngaihthlak ani a. Pu John Zohmingthanga Medical Superintendent in lawmthu a sawi ani.
Valentine’s Day puala Voluntary Blood Donation Camp,2019 buatsaih tut e hi Association for Voluntary Blood Donation ( AVBD ) , MSACSBlood Bank –Civil Hospital te leh Music Domain with Mizoram (MDM) te an ni a.Kumin bik atan hian tanpuina mi thahnemngai tak tak te hnen atangin an dawng bawk ani.
