Minister hian Khankawn to Zokhawthar kawng siamtu TARMAT company te hnathawh dan a hmunah enfiahin, Company aiawhte chu sum awmsa hmanga hnathawk an nih thu hrilhhre nawn lehin, hnathawktu leh hmanrua tam zawk lak belha a hma thei ang bera kawng siam zawh tum turin a chah a. Kawngpui pawimawh tak anih hrerenga tikhawtlai zel lo tura hrilhin, Company hotute leh Project Director te pawh hemi chungchang sawipui vat a tum thu a sawi a ni.
Khankawn atanga Zokhawthar panna kawngpui Kilometres 26 vela thui hi World Bank sum hmanga thawh niin, cheng Vaibelchhe 164 senna tur a ni a, hei hian Zotlang atanga Champhai khawpui panna kawng 2.5 kms a huam tel bawk. Kum 2015 atanga thawh tan nikum 2018 a zo hman tura tih ni mahse zo hman lovin pawhsei a ni.
Hemi hnu hian Green India Mission (GIM) sum kaltlanga Tuichhintlanga Champhai District Park changtlung tak siam anih theihna turin a hmunhma te Official-te nen an en ho leh a. He hunah hian State Environment Forest and Climate Change Department lama hotute; Dr .CH.M Rao, Principal Chief Conservator of Forest (PCCF) , Pu Lalthlamuana Pachuau, Conservator of Forest (CF), Pu C. Lalbiaka, DFO Champhai bakah Pu K. Lalhmuakliana, DLAO Champhai leh Official dang ten an tawiawm a ni.
Vawiin vek khan Champhai South bialtu MLA chuan a bial chhunga Melbuk khua a tlawh a. Amah lo hmuaktute hmaah thusawiin, hlemhletna leh therhlo beiseina dah tha a, rinawmna leh dikna vawng tlat chunga hnathawk thin turin a fuih a. Zofa te inunauna leh inpumkhatna vawn nung zel kawngah chak taka hmalak anih thu tarlangin, Champhai to Tahan bus service tura chak taka sawrkar laipui dawr a hmalak ani, a ti a. Heng bakah hian External Affairs Minister hnenah Immigration Check Post Zokhawthara siam tur leh hmalakna tur tul dangte a sawipui tawh thu a tarlang bawk.
Bialtu MLA chuan Melbuk khuaa inbiakpawhna tha zawk a awm theihna turin helama thawktute ko khawmin meeting aneih pui tawh thu a sawi a, kumin chhungin inbiakpawhna lama harsatna awmte chin fel hman beisei a ni, a ti a. Bial mipuite chu dan lo ang leh thil thalo ti tura nawr lo tura chahin, ram leh hnam siamthat kawnga thawhpuiah a sawm nghal a ni.
