Tukin zing khan Environment Forest and Climate Change changtu Minister leh Champhai South bialtu MLA ni bawk Pu TJ Lalnuntluanga chuan Champhai Tlangsam khaw hmun hlui Jubilee Tlanga Eco Cultural Park siamna tur hmun hmate tlawhin a enfiah.

Minister chuan Champhai Tlangsam hmunhlui Jubilee Tlangah Eco Cultural Park changtlung tak siam tum anih tur thu sawiin, Mizoram sawrkar flagship program State Economic Development Programme (SEDP) hnuaia Ecotourism fund, Green Indian Mission (GIM) project-te bakah LAD leh UD&PA Department-te nena thawkhova hmalak tum a ni, a ti a. Tihfel ngai leh hmanraw mamawhte chinfel thuaia hmalak vat tum anih thu a sawi a. Bialtu MLA chuan ralkhat  atanga project siam mai lova a hmun kalchilha Forest department hotute nena enho a ni chuan hmalak zelna kawngah awlsamna a siam ngei a beisei thu a sawi bawk.

Pu TJ Lalnuntluanga  hi Environment Forest and Climate Change Department hotute, Dr.CH.M Rao, IFS, Principal Chief Conservator of Forest (PCCF) leh Pu Lalthlamuana Pachuau, IFS, Conservator of Forest (CF ), Chanchinbumi te bakah khawtlang hruaitute'n an tawiawm a ni.