Vawiin khan  Power Secretary Pu H.Lalengmawia hovin  a pisaah Digital Payment chungchang meeting neih a ni.

Aizawl khawpui hi India ram puma Smart City 100 thlan chhuah zingah a tel avangin pawisa hmang kher lova internet hmang tangkaia digital payment kalpui a lo tul ta a. Mipuiten kawlphetha kan hman man (electric bill) pawh phone leh computer kaltlangin internet-a pek theihna tur buatsaiha hmalak mek a ni. India ram puma hman tura duan Bharat Bill Payment System (BBPS) hi thla thar  hian Mizoramah pawh hman theih a lo ni dawn ta a. Hemi kaltlang hian awlsam zawkin, BHIM, PayTM leh mobile payment application hrang hrang hmangin electric bill hi pek theih a ni tawh dawn a. Vawiin meeting-ah hian BBPS peih fel a nih veleh zau zawka mipuiten an hriat theihna tura puanzar dan tur ngaihtuah a ni.

Meeting ah hian Power & Electricity Department hotute, Information & Public Relations Department aiawh te, Information & Communication Technology (ICT) official te, Bank hotute leh Consumer Union aiawhte an tel a ni.