Government Aizawl West College's 26th Annual Week kharna hun a hmanpuinaah I&PR Minister Pu Lalruatkima chuan Mizo te kan inenfiah a ngaih thu te, ram leh hnam anga thanharh a hun thu te a sawi a. He mi kawngah hmala thei tur chuan Zirna atanga thanharh leh tanlak chu thil pawimawh hmasa ber a ni a ti.  GAWC Annual Week kharna hun hi Vanapa Hall-ah vawiin khan neih a ni a. He hunah hian GAWC Alumni te chuan an member pahnih Pu C.Lalmuanpuia, MLA leh Pu Lalrinsanga Ralte, MLA te hnenah chawimawina thilpek an hlan a ni.

I&PR Minister Pu Lalruatkima chuan kan nitin  eizawnna hrang hrangah te  leh sawrkar hna pawimawh bik-ah te Mizo thalaite thawhtur hnamdangten an thawk  nasa tih sawi a. Nitin hun kan hman danah khawtlang, kohhran leh chhungkua anga  inenfiah a hun a ti. Mizoram sawrkar hnuaiah ram inrelbawlna kawnga hna pawimawh bik a ngaih, Bawrhsap leh Superintendent of Police hna te chu a thawk tur Mizo thalaite an awmloh avangin hnamdang  ten an thawk deuh vek tawh a. Thalai chauh ni lovin kan zaiin tan kan lak tlan a hun tawh  tak zet  a ni a ti. "Zirna huangah a ti thei fal leh khalh fal chi deuh te chu khawtlang leh kohhranah rawngbawlna leh mawhphurhnaah te pawh awl thiam kan zirtlan a ngai a. Hetianga hma kan lak loh chuan ram leh hnam angin hmasawn a har mai bakah inhumhalh a theih dawn lo a ni", a ti. Pu Lalruatkima chuan sawrkarin All India Services, Central Services, Armed Forces leh a dangah te Mizo thlai tam tak an luh theihna turin hma a la mek zel  tih a sawi a. Ama bialchhungah phei chuan All India Level Service hrang hrangah thalai tam zawk an luhchhoh theih nan Human Resources Development huangah MLA Fund 15% chu kumtin hman dan tur a ruahman mek a ni a ti.

"Zing boruak thianghlim hip hman lova kan thalaite an muhilh hlanah kan mikhual, hnamdang te chuan kan sumdawnna kawtthler lunlaiah te tuktin sum an thawkchhuak chur chur a ni tih han hmuh hian rilru a na a. Thiamna sang tehchiam neih ngai lova eizawnna atan hman theih hna chi hrang hrangte hi Hnam intodelh kan nih dawn chuan,  kan thalai kut themthiam zawk te hian thawh nachang an hriat a hun tawh a ni", a ti. Sawrkar hna thawhvek tumna rilru thalai ten zawi zawiin an thlah tan chu thil lawmawm tak a ni a ti a. Pu Lalruatkima chuan Mizo thlalai te theihna en chuan sawrkar hna aia sang Company hnuaia hna leh rampawn thlenga hna tha tak tak thawh theihna quality  a awm a ni a ti. Hriselna  leh hmasawnna a inkaihhnawih thu sawiin hriselna kawngah tanlak a ngai zual hle bawk a ni a ti a. Kumkhat chhunga pianna zat tla hniam leh thihna zat pung chho mek chu Hnamboral zia a nih thu a sawi a. Hei hi vanduaithlak takin tuna Mizoram dinhmun a nih si avangin sawrkar chuan siam that hna thawh tumin a theihtawp a chhuah dawn tih a sawi a. Hmeithai, fahrah leh a hun lova thihna tipung tu zu leh ruihlo dang te pawh a sawi mawi intihhmuh lovin  kan za kan do tlan a ngai tawh takzet zawk a ni a ti.

Kalkhawmte puala inlawmna thu sawiina hun GAWC Principal Dr P Lalremliana'n a hman hnuah GAWC Closing  Function hi tan a ni a. He hunah hian he college lo lut tawh MLA pahnih te pawh thusawina hun siamsak an ni. Cultural Item, Zai ngaihthlak leh lawmman semna hun hmang ten GAWC Annual Week kharna hun hi hnawhkhah a ni a. GAWC Annual Week-ah hian House hrang hrang inelnaah White House in pakhatna an la a; mimal inelnaah Nl. Lalremsiami leh Tv. Samuel Vanlalruata te chuan Best Girl leh Best Boy lawmman an dawng a ni. Tun dinhmunah GAWC-ah hian thawktu - Zirtirtu 37 leh Office hnathawk 13 bakah  Zirlai 862 an awm mek a. He College hi College that zawng endiktu, NAAC in B+ Grade a pek mek a ni.