Vawiin chawhma dar 11:00 khan DC Conference Hall, Serchhip ah Mizoram Legislative Assembly inthlanpui kan neih taka vote tlate chhiartu tur Counting Supervisor mi 45 leh Counting Assistant mi 45 ten training an nei a. Chawhnu dar 2:00 khan Micro Observer mi 39 ten training an neih chhunzawm ve leh bawk.

Pu R. Vanrengpuia, SDO (S) chuan Training hi a kaihruaiin, inthlanna hmawr bawk a ni tep tawh a vote chhiar hna thawk tura mi bik thlan chhuahte tana training leh an hnathawh tur chu thil harsa anih loh thu leh fimkhur taka hnathawh erawh a tul thu a sawi. DC Office ah Assembly Constituency pathuma vote tlate chhiarna tur Hall hrang theuh buatsaih ani a, Counting Hall No. 1 hi DC Office 1st Floor ah siam niin 26-Serchhip(ST) A/C vote tlate chhiar ani anga, counting table 8 a awm ang, Counting Hall No. 2 hi DC Office 2nd Floor ah siam niin 27-Tuikum (ST) A/C vote tlate chhiar ani anga, counting table 10 a awm ang a; Counting Hall No. 3 hi DC Office 1st Floor ah siam niin 28-Hrangturzo (ST) A/C vote tlate chhiar ani ang a, counting table 9 a awm ang a. Heng Counting Hall hrang hranga duty turte counting staff te chu Randomization Software hmanga thliar fel an nih tur thu leh an chhiarna tur dawhkan tak erawh chu vote chhiar ni, ni 11.12.2018 zing dar 5:00 ah randomization software hmang bawka tih fel chian an ni chauh dawn a ni.

Vawiin hian EVM-a vote tlate chhiar dan tur hi a lem nena entirin training neih pui an ni a. EVM Control Unit leh VVPAT te hmangin a takin vote tla hi chhiar chhin a ni bawk a ni. Legal Provision Rule 66A of the Conduct of Election Rules, 1961 hmanga EVM-a vote tla hi chhiar tur ani ang a. Rule 54A of the Conduct of Election Rules, 1961 hmangin Postal Ballot te chu chhiar a ni thung ang.

He Training hi Pu Chuauhnuna, Addl. DC Serchhip leh Election Official ten an telpui a ni.