Vawiin khan Lok Sabha MP inthlan neih zawh taka Lunglei District huam chhunga Constituency 7 a vote tla te chhiar inpuahchahna State Election Commission team Pu H. Lianzela, Jt. CEO leh Pu C.C. Lalchhuangkima, Dy. CEO te nen DRDA Conference hall, Lunglei  ah thlir ho a ni.

He hun hi Lunglei DEO Pi K. Lalrinzuali'n kaihruaiin vote chhiar tura inpuahchahna kalpui tawh dan Powerpoint Presentation hmangin a sawifiah a, Vote chhiarna hmun tur Saikuti Hall-a Strong Room 7 dah a nih dan leh Ground floor a Counting hall 7 ah vote chhiarna dawhkan 60 dah a nih thu a sawi a, hei bakah hian Medical team leh Media centre siam a nih thu a tarlang bawk a ni.

Joint CEO Pu H. Lianzela chuan Lunglei disrict inpuahchahna chu a tha thawkhat tiin media te counting hall ah vawikhat an luh mai bakah a chhung atanga information mumal tak pe chhuak thintu tur mi vengva tak dah ni thei se a ti a, beisei loh tak buaina chhuak thut thei a nih avangin venhimna pawh uluk lehzuala dah nise a duh thu a sawi a ni.

Deputy CEO Pu CC Lalchhuangkima pawhin he huna kalkhawmte mawhphurhna leh hriattur hrang hrang a sawi bawk. Vote chhiar inbuatsaihna chungchang meeting vawiin a neihah hian Deputy DEO Pu Benjamin Lalzama leh  Lunglei SP Pu C. Lalthanmawia te pawhin inbuatsaihna kalpui dan hrang hrang an sawi bawk. Meeting zawhah hian Vote chhiarna hmun tur Saikuti hall a inpuachahna te a hmun ah en ho leh a ni.