Vawiin khan Horticulture Conference Room-ah Aizawl District huamchhunga Assembly bial 14 inthlan a vote chhiar tura ruat, counting official-te’n training hnuhnung an nei.

Training hi Aizawl District Addl. DC Pu Lalchungnunga’n kaihruaiin, SDO (Sadar) Pu H. Lalhmingthanga’n training a pe a ni. Vawiin training-ah hian inzirtirna hun bakah vote chhiar tur a ruat te atangin vote chhiara an lo tawn hriat tawh in hrilhtawnna hun hman a ni bawk.

Tarlan tawh angin tun tum MLA inthlan a vote tla hi karleh thawhtanni December 9 zing dar 8:00 atangin district tinah chhiar a ni dawn a. Aizawl District huamchhunga Assembly bial 14 te chu Pachhunga University College-a counting hall-ah chhiar a ni ang. PUC Counting Centre-ah hian Counting Hall pathum siam a ni a, Ground Floor ah Counting Hall No.1 Vote chhiarna dawhkan 14 awmna leh Counting Hall No.2, Vote chhiarna dawhkan 10 awmna dah tura ruahman a ni a. Second Floor ah Counting Hall No.3 dah niin Vote chhiarna dawhkan 8 dah tura ruahman a ni bawk.

Vote chhiar tur hian engkim ruahmanna peih tawh a ni.