Vawiin khan Agriculture Conference Hall-ah Training-cum-Awareness Programme, tualto thlai leh thei te an awmna ram/ khua leh ching chhuaktuten a neitu nihna Sorkar hriatpuinaa register a nih theih dan chungchang zirchianna neih a ni a. He training hi nimin ni 5 December, 2013 atang khan Mizorama KVK pariat-a Officer-te tan buatsaih a ni a; vawiin hian neih chhunzawm niin, Pu Lalram Thanga, Principal Secretary, Agriculture chu Khuallian a ni a, Dr. C. Lalzarliana, Director of Agriculture (CH) chu Khualzahawm niin an hmanpui a ni.

Khuallian chuan, India ram hi thlai, thei, thing leh ran chi hrang hrang khawvel ram dangte aia tamna hmun a nih thu leh, hmarchhak State-te leh Mizoram ngei pawh hi a tamna hmun anih thu a sawi a. Hei hian Mizoram a kan tualto thlai, thei, ran, thing leh mau chi hrang hrangte pawh hi ram dangte leh ram changkang zawk ten neitu nihna min neih khalhlohna turin, Protection of Plant Variety & Farmer Right Authority Act, 2001 hmang hian Mizo mipuite pawh kan lo inven lawk hi a tul takzet a ni, a ti a. Heng kan hnam rohlu chi hrang hrang, ram dang a awm ve lo te hi kan ram ta a nih ang ngeia register vat a tul thu a sawi bawk.

He hun hi Director of Agriculture (R&E) Pu C. Lalniliana chuan kaihruaiin, Dr. A.C. Sarma, Deputy Register, Protection of Plant Variety & Farmer Right Authority (PPV & FRA), North East India a hotu ber chuan training hi a pe a. Agriculture Department-a KVK leh Horticulture Department-a Officer-te bakah Mizoram chhunga District 8 atangin loneitu thlanchhuah mi 40-te he training ah hian an tel a ni. Thlai leh thei etc. chingtu loneituten anmahni pual a neitu an nih theihna Dan hi India Sorkar chuan PPV&FRA Act, 2001 ah a siam a, kum 2007 ah hnathawk tanin, India Hmarchhakah chuan 2011 atang khan hman a ni a, tun dinhmunah thlai leh thei etc. chi hrang hrang 57 chu registration tih theih ni tawhin, a dang pawh register theih thuai turin Sorkarin ruahmanna a siam mek a ni. Mizoram a kan tualto thlai leh thei (Local Variety)-te pawh ram pawn miten neitu nihna min neih khalh lohna turin he dan hmang hian registration tih thuai a tulzia zirchhuah a ni.