2830/2023-2024

Dated Serchhip, the 23rd November, 2023: Vote chhiar tura inbuatsaihna kalzelah Brilliant Higher Secondary School, New Serchhip-ah Additional DC Pu Lalnundika hovin Counting Official te tana training hmasa ber buatsaih a ni a. Serchhip District Election Office-ah vawiin chawhma khan Election Officer Pu Lalrinsanga Hnamte hovin EVM First level checking neih a ni bawk.

Vote hi December ni 3, zing dar 8 ah chhiar tan a ni dawn a. Zing dar 8 ah hian Postal Ballot chhiar a ni a nga. 8:30am atangin EVM te chhiar tan a ni thung ang. First Level Checking ah hian Polling Day a reserve EVM te chu lachhuakin training na a hman theih turin buatsaih an ni.

Counting Supervisor leh Counting Assistant te tana vawiina training buatsaihah hian Pu Gaston Vanlalhriatpuia, ARO leh Master Trainer ni bawk chuan hawnna hun a kaihhruai a. Training tura kalkhawm officer rualte chu Counting pawimawhna hrilh hre nawn lehin training an neih chhunga uluk taka ngaithla a, hriat chian loh an neih te pawh inthlahrung lo a zawt chiang turin a chah a. Vote chhiar tak tak ni ah chet sual palh leh tih sual palh engmah a awm lohna turin training an neih laia theihtawp chhuah turin a fuih a ni.

SDO(S) Pi Rebecca Laldinmawii Hrahsel, East Lungdar BDO Pu Albert Vanlalruata leh SDC Pu Lalhruailiana Zote ten zirtirna hi an pe a. Vawiin training ah hian Counting assistant mi 45 leh Supervisor mi 35 ruat chhuahte chu hmun 2 ah then niin a thawhkhatna hi chawhma lama neih niin a thawh hnihna chawhnuah neih chhunzawm a ni ang. Naktukah hian counting agent te tan training buatsaih a ni leh dawn bawk a ni.