2831/2023-2024

Dated Serchhip, the 23rd November, 2023: NH54 kawngpui laih mekah Serchhip District huam chhunga sawrkarin ram a lak fel tawh, dan anga zangnadawmna - compensation leh Rehabilitation and Resettlement sum leh pai dawng tawh te zingah in leh lo thiat duh lo lui an la awm avangin Serchhip District Administration chuan Competent Authority for Land Acquisition (CALA) an nih angin dan tlawh chhanin hma an la dawn.

Nimin khan Serchhip DC Pu David Lalthantluanga chuan Chhingchhip leh Chhiahtlang khuaa NH54 kawng laih mek a tlawh a. Compensation dawng tawh zingah mahni in la thiat duh lo te chungchang ngaihtuahin a hmunah a enfiah a. July leh August thla khan Magistrate ten an inah ngei kal chilhin an in te thiat tura thupek eviction notice pawh an lo pe tawh a. August thla chhunga thiat ngei tura beisei an nih laiin vawiin thlenga thiat lo la awm te chu kar lehah dan angin an chungah action lak a ni ang.

Kar thar lo awm turah hian mahni in thiat duh lo te chu IPC Section 188 hmangin thubuai siamsak an ni dawn a, jail tan thlengin hrem theih an ni ang. Magistrate kaihhruaiin an in leh lo te chu nawrchhiat sak an ni ang a. Hetianga dan anga action lak kher a ngaih lohna turin District Administration chuan Serchhip District chhunga khaw hrang hranga in thiat duh lo la awm te chu thiat vek turin a hriattir nawn leh a ni.

Tarlan tawh angin NH54 kawngpui laih mekah hian Serchhip District huamchhunga compensation dawng tawh zingah 93% chuan an in te an thiat fel tawh a. Mi tlem te chauh thiat lo an awm tawh a. Heng khaw hrang hrang a Village Council te, khawtlang hruaitute leh khawtlang mipuiin kawng tha a awm theihna tura sawrkar hmalakna an thlawp tlat avangin District Administration chuan lawm thu a sawi a ni.

Kum thar March, 2024 chhung ngeiin Sawrkar Laipui chuan NH54 kawngpui laih mek hi hawng hman ngei turin a hriattir a. Kawng laitu company te hi December thla chhunga thawk zo turin Sawrkar Laipui chuan na takin a nawr bawk a ni.