No.4427/2020-2021

Dated Serchhip, the 24th August, 2020: Vawiin hian Serchhip DC Meeting Hall ah Bawrhsap Pu Kumar Abhishek, IAS hovin tlawmngaipawl hrang hrang hruaitute leh MJA hotute nen kan hmalawka VC inthlan vote thlak nia Polling Station kalpui dan tur an sawi ho.

 

Chairman Pu Kumar Abhishek chuan, mipuiten Covid19 hrileng mek karah him taka vote kan thlak theih nan State Election Commission chuan state level tlawmngaipawl hrang hrang aiawhte a lo sawipui tawh a.  Chumi hmalakna kal zelah Serchhip District chhungah pawh mipuiten kokim tak leh him taka vote kan thlak theih nan ruahmanna siam a ngai a. Commission in himna dan a duante leh sawrkar thupek ding laite hre renga ruahmanna siam a tul tih sawiin chumi hmalakna duan tura committee pawh koh a nih thu a sawi hmasa a ni.

 

Meeting chuan, Commission in tum khatah Polling Area ah vote thlak tur mi 50 aia tam lo, feet ruk danah inhlat zela awm tur a a tih angin; khawtina MPF emaw YMA emaw VLTF ten he inkaihhruaina hi a hlawhtlin theih nan ruahman lo siam se. An khawtlanga a remchan dang zelin a section emaw a veng thler emaw E - Roll a serial milin emaw darkar tina vote thlak tura kal tur ruahman se, chutianga mipuite pawhin vote an thlak theih nan Information Mike ah taima taka au reng ni se, a ti a. Vote thlak tura kal ten sawrkar dan dinglai angin Mask emaw puanin emaw an hmai an tuam ngei ngei tur a ni a. Mi, a vote thlak hun tura ruatah a lo kal hman ngang lo anih chuan a rawn kal hman huna midangte ruala intlar ve tir mai tur a ni thung ang a, vote thlak inkhap sak a rem dawn lo a ni. Tin, vote thlak tura kum upate, damlo te, pianphung rual ban lote, raipuar leh naupawmte an lokal chuan intlar khawmuan tir lova vote thlak tir nghal tur a ni ang. Mizoram chhung khaw dang atanga vote thlak tura mi an haw lo khap emaw vote thlak tir phal loh emaw pawh a rem lova, him taka voters zawng zawng ten vote an thlak dan tur kha lo ruahman mai zawk tur a ni. Polling Area chhungah Social Distancing tha taka kalpui tur anih avangin achunga sawi tlawmngaipawlte khian ruahmanna lo siamin a remchan danin voters te din tlarna tur lo duang se, voter registration leh vote thlaktute sanitizer lo pe zel tu tur mihring pawh lo inruahman se a ti bawk a. Mipuite hnenah vote thlak chu a him ngei a ni tih hrilh tama vote thlak tura uar taka insawm ni se a ti bawk. Heng ruahmanna te hi Official duty te nena engkim ruahman ho zel tur a ni ang.

 

Heng te bakah hian vote thlak nia hmalakna tur pawimawh dang te pawh sawi ho a ni. He hunah hian Pu R. Sathiyasundaram, IPS, SP, Pu Lalmuansanga Ralte, Addl. DC, Pu Vanlalhmachhuana, EO leh Serchhip District NGOs Coordination Committee aiawhte, District MPF aiawhte, Sub Headquarters MUP,YMA, leh MHIP te, District MJA aiawhte an tel a ni.

Attachment

  • Loading attachment...