Vawiin chawhma dar 11:00 AM khan Champhai District Bawrhsap Pu Lalthangpuia Sailo kaihhruaina in Champhai DC Conference Hall, Keifang Tlang-ah SVEEP ( Systematic Voters Education and Electoral Participation ) Committee neih a ni. SVEEP thil tum leh nihpung sawi hawnna neiin Dist. Bawrhsap chuan voters te dinhmun leh mawhphurhna pawimawh zia sawiin vote nei reng si a, vote thlak loh chu mahni mawhphurhna hlen lohna a niin a tha lova, khua leh tui dik tak , vote thlak thei chin chuan vote thlak chu tih makmawh a niin vote la nei lo, la nei tur te pawhin hei hi kan hriat a, kan ngaih pawimawh a tul a ni a ti.

Pu Zoengsanga, Addl. DC pawhin SVEEP chungchang hrilhfiah in General Election kan hmachhawn mek tur atan tun atanga chiang zawka kan lo in zir chhoh lawk ngai a, vote kan thlak hi citizen kan nih anga kan duty a nih thu leh SVEEP hian vote thlak thei tura enrollment a ngai pawimawh em em a, zirlai vote nei thei chin la nei lo te pawh nasa taka hotu ten vote an neih theih dan tur zawnpui a ngai a ni a ti.

Pu Mark Lalthanliana, Champhai Election Officer chuan kum 2008 Election ah vote tla a tha in 81.42 % a ni a. MP Election ah erawh chuan 53 % chauh anih avang in tan lak a ngaih thu leh tun tum inthlan lo awm turah hi chuan 90 % chuang ni thei ngei tura hma lak a that thu sawiin hemi atan a hmalakna turin Training te pawh buatsaih zel tura hmalak mek a nih thu leh scheme tha tak buatsaih dan tur te sawiin hemi atan hian a tul dan anga Fund a rawn kal dan tur a sawifiah nghal a ni.

Political nawrna ang ni lovin, Education ang zawnga kalpuiin Voter te a tul anga zirtir nise, a tul thu Pu Alan Lalthanzara, Nodal Officer chuan sawiin Election hmachhawn tawhte en nawn a , voter te vote thlak tura zirtir leh voter la ni mai turte lo zirtir lawk chu SVEEP tum a nih thu sawiin , vote kan thlak chuan rorelna ah kan telve a; ni tih mitin te in zirtir a tul thu a sawi bawk.

Champhai District 3185 sq. Km ah hian mihring 1,25745 an cheng a. Committee chuan Champhai District chhung chu SVEEP in a duh anga, voter te mawhphurhna hriat nawn tir leh chu tha taka hlen tumin a rang thei ang bera committee neih leh an tum a ni.