Election Department buatsaihin vawiin khan State Level Systematic Voters Education & Electoral Participation (SVEEP) workshop chu MZP Conference Hall, Treasury Square ah neih a ni. SVEEP hi ram hruaitu thlannaa a thlangtu mipuite chanvo leh mawhphurhna pawimawhzia hrilhhretu leh vote nei zawng zawngin vote an thlak vek theihna tura hmalatu a ni.

India khua leh tui, kum 18 tling chin apiangte chu Electoral Roll-ah inziak lutin, ram hruaitu inthlannaa mahni vote hlu tak thlak theuh turin Election Commission chuan a beisei a. Vote nei zawng zawngin vote an thlak theih nan SVEEP hmangin beihpui thlak chhoh mek a ni a, vawiina workshop neihah hian tlawmngai pawl hrang hrang, zirtirtu, zirlai pawl hruaitu leh sorkar department kaihhnawih aiawh kal khawmte hnenah Pu S. Chandrashekhar, OSD, SVEEP, Karnataka chuan zirtirin SVEEP Mizorama hlawhtling taka kalpui a nih theih nan hmalak zel dan turte sawihona hun tha tak an hmang bawk a ni.

SVEEP tihhlawhtlin nan hian zirlaite zinga hma la turin school leh college hrang hranga zirtirtu 47 chu Campus Ambassador ah ruat an ni a, mipui inzirtira infuih nan radio leh television & cable TV lamah te chhuah turin video clip te buatsaih a ni bawk. Inthlannaa mi thenkhatin vote an thlak peih lohna chhan pakhat chu Polling Station pakhata voter tam lutuk avanga rei tak tak intlar ngai thin hi a ni tih hriain hemi tihbo nan hian tun tumah chuan Polling Station tinah voter 1200 pel lo turin Polling Station siamremna (rationalisation) tihfel niin a thar 58 lai siam belh a ni a, vote thlak turin rei tak nghah a ngai dawn tawh lo a ni. SVEEP vang hian Tripura leh Karnataka State ah te chuan vote thlak zat nasa takin a pung a, chutiang chu Mizorama tun tum inthlanna turah hian thlen ve ngei beisei a ni a. Mipui rorelna sorkarah sorkar dik leh fel siamtheihna tura kawng tangkai ber chu vote thlak that hi niin hei hi SVEEP thiltum ber pawh a ni.

SVEEP workshop hi Aizawl DC Dr. Franklin Laltinkhuma leh Champhai DC Pu Lalthangpuia Sailo ten an hmanpui a ni.