4250/2024-2025

Dated Serchhip, the 14^th February, 2025: Serchhip District Election Office chuan kumin Village Council inthlanah vote tla a that theihna turin Village Level Officer te leh Sector Officer te tan inelna a siam a.  DC Meeting Hall-a programme buatsaihah Serchhip DEO Pu Paul L.Khuma chuan a titha te hnenah lawmpuina a hlan a ni.

Tun tum election-ah hian Serchhip District chu Sector pariatah then niin Sector tinah hian voter tam dan a zirin khua leh veng engemawzat dah khawm a ni a. Heng Sector te hi a viltu turin Sector Officer ruat an ni a, Magisterial power pek theuh an ni bawk. Vote tla a that theihna turin anmahni sector theuh vil uluk tur leh enzui (monitor) tura tih an ni a. Sector pariat zingah Serchhip Vengchung, Chhim Veng, Field Veng leh Hmar Veng te chuan ti tha berin vote hi 82.43% a tla a. A bialtu Sector Officer Pu Gaston Vanlalhriatpuia hnenah lawmpuina thuziak leh pawisafai DC hian a hlan a ni.

Village Level Officer te zingah voter tam dan a zirin category 3-a thenin inelna siam a ni bawk a. Category 1 (voter 1200 chin chunglam awmna) ah hian Serchhip Vengchungah vote 84.13% tlain an ti tha ber a, VLO Pu Vanlalruata hnenah lawmpuina hlan a ni.

Category 2 (voter 600-1200 awmna) ah hian lawmpuina dawngtu chu Pu Lalchhuana, Darnam VLO a ni a. Darnamah hian Vote 83.36% a tla a ni.

Category 3 (voter 600 hnuailam awmna)-ah hian lawmpuina dawngtu chu Buangpui VLO Pu C.Lalramthara a ni a. Buangpuiah hian vote 90.12% a tla a ni. 

Heng bakah hian Serchhip Sub Headquarters YMA, Serchhip Sub Headquarters MHIP, MPF, Government Serchhip College Electoral Literacy Club te leh Serchhip MJA te hnenah lawmthu sawina sumfai hlan a ni bawk a. Vote tla a that theihna turin heng pawl hrang hrang te hian District Election Office theihtawp chhuahin an thawhpui a. Mahni veng leh khuaah te in tinah kalin vote thlak theuh turin mipui an sawm bakah, vote thlak niah voter te tanpui turin ni lengin MPF te leh ELC te hi an duty a ni.