Chief Electoral Officer’s Office, Mizoram buatsaihin vawiin khan NLUP Conference Hall-ah “State Level Workshop and Sensitization on Voter Awareness Forum(VAF), VVIP & SVEEP” neih a ni a, Mizoram chhung hmun hrang hrang atangin Voter Awareness Forum Nodal Officer te he training ah hian an tel a ni.
He Workshop hi Mizoram Chief Electoral Officer Pu Ashish Kundra, IAS chuan telpuiin Nodal Officer kalkhawmte chu an mawhphurhna theuh te tha taka hlen chhuah tum turin a chah a, Election Commission of India in dan leh ruahmanna thar engemaw zat a siam a heng te hi kan hriat bel a ngai ani a ti a, Voter Awareness Forum chu Sawrkar Department hrang hrang bakah NGO leh Corporates ah te pawh din tur ani a, he Forum kaltlang hian inthlanna a vote thlak a pawimawhzia leh inthlan kaihhnawih thil pawimawh chi hrang hrang inzirtir tur anih avangin inthlanna a vote tla pawh nasa takin a pun phah beisei a ni a ti a,hei bakah hian Electoral Roll a thun thar te abik takin a vawikhatna atana vote thlak tur te ngaihpawimawh a vote an thlak theih ngei nan anmahni pawh fuih an pawimawh ani a ti. Voters te hnenah EVM a him zia uar taka zirtir a tul thu sawiin Election Commission of India chuan Universal Helpline number 1950 (Toll free) a siam a, he number ah hian inthlan leh a kaihhnawih chungchangte a zawh theih bakah hriatchian duh leh sawisel (complaint) duh nei tan engtiklaipawhin biak theih anih thu a sawi.
CEO chuan Nomination withdraw theih ni (March ni 28, 2019) thleng Electoral Roll a lut duh tan a dil theih ani a ti a, anmahni bialtu BLO kaltlanga a tih theih bakah “Voter Helpline” Android mobile application kaltlangin a tih theih a, he mobile application hi Google Playstore atang download theih niin hemi kaltlang hian voter ten an electoral roll a an chuan leh chuan loh te an en thei a, address thlak pawh he mobile apps hmang hian a dil theih a ni. Hei bakah hian Google Playstore atang bawkin c-VIGIL application a download thwih a, hei hi Model Code of Conduct bawhchhiatna thleng thinte mipui mimirin an complaint zung zung theihna tura ruahman niin hemi kaltlang hian thlak nen complaint a register theih a, chu complaint chu District Control Room ah thawn niin rang takin bawhzui anih thin dawn thu CEO chuan a sawi.
Pu H.Lianzela, Jt. CEO pawhin Sawrkar hnathawkte zingah vote a tlak that hi Election Commission of india hian a ngaipawimawh em em a, hemi atan hian Voter Awareness Forum pawh hi duan ani tel ani a ti a, Administrative Department tin ten Nodal Officer an ruat ngei ngei tur ani tiin Vote thlak ni thlenga an tih tur leh hmalak dan tur te a sawifiah a ni.
Vawiin Worskhop ah hian “Systematic Voters' Education and Electoral Participation” chungchangah Pu Lalmuan Puia, SLMT in zirtirna a pe a, “Voter Awareness Forum leh Voter Verification and Information Programme” chungchangah Pu Malsawmzuala, ACEO in zirtirna pe in Pu H. Lianzela Jt. CEO hovin sawihona leh zawhna leh chhanna hun hman a ni.
