Vawiin khan National Immunisation Day (NID) 2019 chu Lawngtlai Electric Veng Anganwadi Centre-ah Lawngtlai Bawrhsap, District Task Force Immunisation chairman ni bawk Pi Shashanka Ala, IAS chuan Lawngtlai District tan a hawng.

Lawngtlai Bawrhsap chuan hrisel nana hri danna  lak that pawimawhzia sawiin, nu leh pate'n ngai pawimawh deuh deuh va, hri danna lak theih ang ang chu hmaih nei lova an fate laktir zel turin a chah a. NID hawn nan zenghri danna (oral polio vaccine) chu naupang pathum hnenah a pe hmasa a ni.

He hun hi Lawngtlai Chief Medical Officer (CMO) Dr Lalthlamuana'n a kaihruai a. Zenghri chu India ram atanga um bo ni tawh mah se,thenawm ramte'n an la um bo ve loh avangin hri danna pek chu kalpui chhunzawm zel a la nih thu a sawi a. Lawngtlai Child Development Project Officer (CDPO) Pi Hlawnchii chuan lawm thu sawiin, zenghri danna chu naupang kum 5 hnuai lam hnenah pek chhunzawm a ni.

NID 2019-a zenghri danna pek tur Lawngtlai District target chu naupang 14693 a ni a. Hri danna hi a pekna tur booth 196-ah health department leh anganwadi-a thawktute'n an pe a ni.

Vawiina booth-a mahni kal thei lote chu naktuk hian an ina kal chilhin hri danna hi pek an ni ang a. Booth level leh home visit-a ti tha zual anganwadi worker pathum hnenah lawmman (cash incentive) pek an ni ang.