526/2026-2027

Aizawl, the 14th May, 2026: College of Veterinary Sciences & Animal Husbandry (CVSc&AH), Central Agriculture University (CAU), Selesih chuan vawiin khan thuthar thehdarhtute tan chemical fertilizer leh rannung thahna hlo a innghat lova, daih rei zawk leh leilung tichhe lo zawnga Lo neih chawilar tulzia hrilhhriatna Press Conference, “Promoting Alternative Agriculture Practices leh Enhancing Nutrient Management Efficiency” tih thupui hmangin Conference Hall, CVSc&AH, Selesihah a buatsaih.

Dr. Lalnuntluangi Hmar, Dean, CVSc&AH, CAU, Selesih chuan thupui thlan chu ei leh bara intodelh tura pawimawh tak a nih thu sawiin, Lo neih dan nghet leh tlo bakah environment humhalh pawimawhnate mipui zirtir kawngah media-te nena thawhhona tha neih a tul thu a sawi a. Agriculture-in harsatna tam tak a tawh chhoh mek zel thu sawiin, lei da, thlai thar chhuah nana senso sang chho zel, sik leh sa inthlak leh chemical fertilizer nasa taka hman ten nghawng tha lo tak a thlen thu a sawi a. Thar chhuah tihpun ringawt tinzawn lova, daih rei zawk leh leilung hriselna humhalh chunga kuthnathawktute tana hlawk zawka thar thlai chhuah dan zawnpui a tul thu sawiin, hemi a nih avang hian India ram pumah chemical-a innghat lova organic uar lehzual tura hmalak a ni, a ti a. Daih rei zawk leh leilung tichhe lo zawnga Lo neih chuan sum sen a tih hniam thu leh sum lakluh pawh a tihpun thu a sawi bawk.

Mizoram chhunga Central Agricultural University hnuaia institution pathum - CVSc&AH, Selesih; College of Horticulture, Thenzawl leh KVK, Aizawl-te chuan alternative agriculture lama hmasawn nan loneitute zirtirna hrang hrang, Kisan Gosthi, Field Demonstration leh social media hmangtein Mizoram hmun hrang hrangah an kalpui thu a sawi a. College of Horticulture, Thenzawlin liquid biofertilizer siam chhuakin loneitute hnena a pek chhuah thu a sawi bawk a. Heng institution pathumte hian tunlai thiamnain mitin hnen a thlen theih nan hma lak zel an tum thu sawiin, press conference chu hemi peng pakhat a nih thu a sawi a. Lo neih dan tha, him leh hlawk zawk kalpui a nih theih nan kuthnathawktute chu ngaihtuahna lo seng tura chahin, thawhhona tha tak neih puiah a sawm a. Harsatna neite chuan Central Agricultural University hnuaia mithiamte an rawn theih reng thu a sawi bawk.