3070/2023-2024

Aizawl, the 16th December 2023: Tukin zing karah khan India ram hmundangte rualin Vijay Diwas (Hnehna Ni) puala programme buatsaih chu War Memorial, Treasury Square-ah Governor Hari Babu Kambhampati hovin hman a ni.

He hunah hian Governor Hari Babu Kambhampati in India Sipai huaisen te zahna chibai bukin Martarte thlanah pangpar a dah hmasa ber a. Chief Minister Pu Lalduhoma leh mi pawimawh dang te pawhin Governor hnung zui hian Martarte zahna an lantir a ni.

Sawrkar Civil leh Sipai lam hotute atangin Home Minister Pu K.Sapdanga, Chief Secretary Dr Renu Sharma, Hav Lalbiakthanga, Padma Shree recipient leh  War Veteran ni bawk, Home Commissioner Pu H.Lalengmawia, Brig Girish Upadhyay, SM, VSM, DIG of 23 Sector Assam rifles, ADGP Pu Ajay Chaudhary, leh mi pawimawh dang te pawhin zahna lantirin War Memorial-ah hian pangpar an dah a ni.

(Hnehna Ni) hi kumtin December 16-ah India ram pumah hman thin a ni a. Hemi ni hi India sipai ten Indo-Pakistan war of 1971-ah Pakistan laka hnehna an chan ni leh tunhmaa East Pakistan tuna Bangladesh pian chhuah ni hi a ni. He indonaah hian Pakistan sipaite chu tlawmin an awp ram East Pakistan tia hriat chu Bangladesh tia thlak a ni ta a. He mi tum hian Pakistan sipai lalber (Chief of the Pakistan Forces) General Amir Abdullah Khan Niazi chu a sipai 93,000 zet nen hnuaiah Ramna Race Course tuna SuhrawaryUdyan, Dhaka-ah General Jagjit Singh Aurora kaihhruai allied forces (India sipai leh Mukti bahini) hmaah an inpe a. Hemi ni hi Bangladesh chuan Bijoy Dibos tih hmingpuin an lawm bawk thin a ni.