2799/2026-2027

Lunglei, 2026 Khuangchawi Thla ni 23: Cheng nuai 44.75 senga sak, Lungsen ICDS Office building thar chu vawiin khan Women & Child Development (WCD) Minister Pi Lalrinpuii'n a hawng.

Lungsen ICDS Office building thar hawn puala inkhawm buatsaihah Khuallian, WCD Minister Pi Lalrinpuii chuan a hranpaa sum hmuh awm lova CDPO leh WCD hotute hma laknaa Lungsena ICDS Office building thar ṭha tak mai sak zawh leh hawn theih a ni chu lawmawm a tih thu sawiin, mi tih dan phung leh tih ṭhin tawh dan ang zui mai lo va, mipuite tana thil ṭha zawk a thlen theih nana hma thar la ngam officer leh sawrkar hna thawk an awm ṭhin chu lawmawm a tih thu leh a chhuan thu a sawi a. Mizoram chuan WCD hma laknaah India ram pum huap pawhin a ti ṭha thawkhat viau tih sawiin, inkaihhruaina (guidelines) khauh tak, phai ram mila duan hmang chungin department hotute leh thawktute'n ngaihtuahna thar senga hma an lak ṭhin thu a sawi a. Chu'ng hma laknate chu sawrkar laipui lam pawhin ṭha an tih thu leh state dangte entawn tur leh tih ve tura hma an lak hial thu a sawi a. Tun hnai lawka Poshan Maah – Nutrition Month hnuaia ei leh in tur ṭha pawimawhna inzirtirnaah pawh Mizo nunphung nena inmil tak – "Wadi Makpa" chin chhuah thar a nih thu sawiin, sawrkar leh mipui vantlang thawh hona ṭha nei tura hma lakna a nih thu leh mipui vantlangin sawrkar hma laknaa neitu nihna tam zawk an neih a, ta neihna tak tak an neih theihna tur a nih thu a sawi a. Hma lakna pawimawh leh ṭha tak a nih angin uar zawka kalpui chhoh zel a nih a beisei thu a sawi.

WCD Minister Pi Lalrinpuii chuan damdawi tel lo, hlo tur tel lo thlai chi hrang hrang thar chhuah a nih theih nan department-in Poshan Vatika hnuaiah chuktuah huan, "Nutri Garden" siam an kalpui tih sawiin, Anganwadi Centre-a naupang leh nau paite tana chaw ṭha sem ṭhinah pawh a theih chin chinah chuan khawtuala thar chhuahte sem ngei tura ruahmanna siam ṭhin a nih thu a sawi a. Rannung thahna hlo leh hlo tur chi hrang hrang hmanga enkawl thlai ei chu hriselnain a tuar theih thu sawiin, mahni thar ngei chawhmeh thianghlim, damdawi pawlh loh nei thei turin khaw tinin intodelh turin hma la thar zel se a duh thu a sawi.

Khual Zahawm, WCD Director Pi Zoramthangi Chhangte chuan Lungsen ICDS Office building thar hawn chu WCD tana mellung pawimawh tak a nih thu sawiin, building sak nana eng scheme aṭang maha sum hmuh hranpa awm lova sak puitlin a ni chu a hlutna leh a danglam em emna a nih thu a sawi a. CDPO leh thawktute inpekna leh ṭhahnem ngaihnaah lawm thu sawiin, Lungsen ICDS Project hma lakna hrang hrangah mipuite pawhin theih tawpa thawhpui a, ṭawiawm zel turin a ngen.

Lungsen ICDS Office building hawnna inkhawm hi Social Welfare, Women & Child Development (SW&WCD) Joint Secretary Pi Zonunthari chuan a kaihruai a. Lungsen Child Development Project Officer (CDPO) Pu Vanlalsanga chuan building saknaa an hma lak dan tlangpui sawiin, Lungsen-II VCP Pu J. Dengkunga pawhin thu a sawi a. WCD Deputy Director (W) Pi Flora Lalṭanpuii'n lawm thu sawiin hun a khar.

Lungsen ICDS Project hi 1983-a din a ni a. Tuna office building thar hi office-in fund an hmuhte renchem taka hmang a, office sakna tur atana tlem tlema sum an khawl hmang leh Directorate aṭanga puihna hmanga sak niin, a sak nan hian cheng 44,75,248/- sen a ni a. Office sak hna hi November 2025-ah ṭanin, October 2026-ah thawh zawh a ni a. A building hi Zopa chhiara chhawng thum niin, a dung fit 48 leh a vang fit 34-a zau a ni a. First Floor hi Office atana hman tur niin, Office chungah hian CDPO Quarters (36 x 24 sq. ft) awm a. Ground floor hi 44 x 36 sq. ft-a zau niin, Training Hall atana hman tur leh Store Room ṭha tawk tak a awm bawk.