4306/2024-2025

Aizawl, the 18th February 2025: Rural Development Department hnuaia tuihna siamthar lehna (springshed development) tura thawhhona thuthlung (Memorandum of Understanding) chu Rural Development Department leh North East Initiative Development Agency (NEIDA) ten vawiin 18th February, 2025 chawhma dar 10:30 AM khan Rural Development Minister Prof. Lalnilawma Chamber-ah an ziak.

He thawhhona thuthlung hi kumkhat atan niin a țul ang zela pawhsei theih tura ruahman a ni.

Minister Prof. Lalnilawma hmalakna-in Rural Development Department-in Project a kalpui mêk zinga Pradhan Mantri Krishi Synchayee Yojana - Watershed Development Component (WDC-PMKSY 2.0) chu Watershed Development hna thawk a nih avangin MGNREGS nena tangkawpin Project-in a tuam chin khua-ah te Tlawnglui fintu tuihnar tihchak thara beihpuithlák nise, a hmingah pawh 'Project Tuihna- Dam khawchhuahna' tih a ni a. WDC-PMKSY 2.0 hian Springshed Development lama tawnhriat lo nei tawh NEIDA te a lo thawhpui tawh thin avangin mumal leh awmze nei zawka tuihna siamtharna tur ruahmanna siam turin Department chuan NEIDA hi thawhhona thuthlung a ziahpui ta a ni.Thawhhona thuthlung hi Department aiawhin Pu R. Zarzosanga, IAS, Commissioner & Secretary, RD Department leh Pu Lalrinkima Bawite, State Program Co-Ordinator, NEIDA ten an ziak a ni.

Thawhhona thuthlung ziahna-ah hian Prof. Lalnilawma, RD Minister chuan thu sawiin tuihna kiam nasat tawhzia leh mipuite tuihna humhalh kawnga tan lák a țulzia sawiin January 2024-ah Tlawnglui chu 171.5 MLD a nih laiin January 2025 ah chuan 104 MLD a nih thu tarlangin kan luitui leh a hnar te humhalh a, tuihna tipung zawnga tanlak a țul thu a tarlang.

Project Tuihna- Dam khawchhuahna hian Mizoram chhunga lui tui, kan ei leh in atana kan hman zawng zawngte-ah hmalak tum a ni dawn a. Hemi atana Springshed Development hnathawh dan tur ruahmanna Ground Survey leh Detail Technical Report (DTR) te chu NEIDA lam hian an kalpui anga, ruahmanna siam angin WDC-PMKSY 2.0 lch MGNREGS ten tangkawpin hna an thawk ang a, Department dang pawh a țul leh mamawh ang zela thawhpui tur a ni ang.

Ruahmanna hmasa-ah chuan Tlawng lui tinzawn niin Tlawng hnar atanga hrut thla-in Tlawng chawmtu luite leh tuihna siamthar lehna tur ruahmanna siam niin Lunglei District, Serchhip District, Aizawl District leh Mamit District huam chhunga khaw 42-ah te zirchianna neih tawh a ni. A tahtawlin hmundangah pawh zirchianna hi kalpui zel tur a ni.