No.3519/2021-2022

Aizawl the 28th December, 2021: World Health Organisation (WHO) chuan Covid-19 hri pui leng dona kawnga hmanraw pawimawh tak sample test kit India tangka cheng vaibelchhe 4 chuang hu Mizoram tan an hlan a, vawiin chawhnu khan Health Minister Dr R. Lalthangliana’n Zoram mipuite aiawhin a pisa ah a dawng a ni.

WHO in vawiina sample test kit an hlan hi South Korea siam Rapid Antigen Test Kit (RAgT) 3,60,000 leh RT-PCR Test kit 1,80,000 a ni a. WHO aiawhin Dr.Lalhlimpuii, Surveilance Medical Officer, World Health Organisation chuan a hlan a ni.

He hunah hian Health Minister Dr R. Lalthangliana chuan World Health Organisation chungah lawmthu sawiin kum thar lo thleng turah tluang taka an hmalakna te a hlawhtlin theih nan duhsakna a hlan a, kumin July thla khan WHO hian Mizoram tan Oxygen Concentrator engemawzat Mizoram tan an hlan tawh a, hetih hun lai hui Mizorama COVID-19 hri kai kan tam vanglai tak a ni bawk nen, kan sum dinhmunte thlirin rilru a hah em em mai a, tlawm leh zah pawh dawn lova remchanna la in ka thahnemngaiin kan mamawh dangte ka lo thlen ve ringawt mai a, beisei sang lutuk ngam lovin theih ang angin kan umzui a, Pathianin remruatna felfai tak a nei a, a hun takah WHO kaltlangin tanpuina kan dawng hi a lawmawm takzet a ni, a ti.

Health Minister chuan kum 2 dawn hripuiin min chenchilh chhung hian India ram pawn, ramchhung leh Mizoram chhung atangin tanpuina chhiarsen loh kan dawng tawh a, heng tanpuina kan dawnte hi kan chhinchhiah vek a, mimal, pawl, kohhran, office leh company ang te a tanpuina min petute chungah lawmthu ka sawi a, a bik takin RT-PCR test kit leh rna extractor hi a to in a hautak em em a, ICMR in a thlawna min pek tawh zawng zawng hi cheng vaibelchhe 20 chuang hu a ni tawh a ni a ti a, Mizoram hmangaihtu hmun hrang hranga mite zarah kan vannei hle a ni, a ti.

Dr Thangtea chuan NITI Aayog in Pathianni kalta a Good Governance Index, 2021 a tichhuah ah North-East and Hill States category-ah Mizoram chuan Public Health Sector ah a titha ber pakhatna dinhmun kan hauh a, Commerce & Industries sector ah pawh a titha berte zingah min puang a, heng malsawmna kan dawn hi Zoram mipuite leh sawrkar department te theihtawp chhuaha kan intawiawm tlanna in a rah chhuah a ni a, hma sawn zel tura kan tanrual tlan zel a ngai a ni a ti a, kum thar lo awm tur atan Zoram mipuite duhsakna hlan nghalin SOP ngai pawimawh chunga fim khur turin a ngen a, felfai tak leh hlim taka Pathian chibai bukna hun hmang turin Zoram mipuite a chah a ni.

COVID-19 dona kawnga theihtawp chhuahtu MKHC, Jt. NGO Coordination Committee, ACLCA, VC Association, LLTF/VLTF, IMA, MOT, MGDA, NGHAM, Volunteers, Hrontline Workers, Sawrkar officialte, mimal, chhungkua leh pawlho hrang hrangte chungah lawmthu a sawi bawk a ni.

Health Secretary Pu R. Lalramnghaka pawhin COVID-19 kan hmachhawnna kawngah Pathiabn leh Mizoram sawrkar thatna a takin kan hmu a, Health Minister in tlawm leh zah pawh dawn lova theihtawp a chhuah hi pathianin mal a sawm a ni, a ti a. COVID-19 variant thar Omicron a rawn chhuah takah hian sawrkar laipui chuan State leh UT sawrkar zawng zawngte vawi duai lo lehkha rawn thawn tawhin COVID-19 sample test zat hi nasa taka tipung turin min rawn nawr mek a, kan dinhmun thlirin sample test kit lei hi a hautak takzet a, mamawh belhna a sang lehzual bawk a, hetih hun lai taka WHO an rawn lang hi a lawmawm takzetin anmahni kaltlangin Pathian a che a ni tih a lang a ni, a ti.

Dr.Lalhlimpuii, Surveilance Medical Officer, World Health Organisation chuan WHO in State bil tan COVID-19 sample test kit hi a lei ngai lova, Health Ministerin theihtawp chhuaha hma a lakna an hriatin an ngai pawimawh em em a, India ram level-ah a tihfel theih loh avangin WHO, South-East Asian region office-ah tih a ngai a, hei vang hian July thla a dil ni daih tawh kha a tlai phah deuh a ni, a ti a. PPE kit 5000 Mizoram tan an pek leh tur thu a sawi bawk a ni.