No.1943/2021-2022

Aizawl the 20^th August, 2021 : Vawiin khan Dr. Pachuau Lalmalsawma, State Nodal Officer & Official Spokesperson on COVID-19 chuan COVID-19 hrik chhuak thar a awm leh awm loh finfiah tura Mizoram atanga COVID-19 positive te swab sample 151 Whole Genome Sequencing tura National Institute of Biomedical Genomics (NIBMG), Kalyani, West Bengal-a an thawn result niminah an hriat thu sawiin, sample 151 an thawn zinga 115 ah COVID-19 hrik thar Delta (B.1.617.2) variant hmuh a nih thu a sawi a, hei hi sample thawn zawng zawng atanga 78% a ni.

Sample te hi Aizawl district a mi vek an nih thu sawiin Dr. Pachuau Lalmalsawma chuan zirchianna neih tawh chinah Aizawl, Lunglei, Kolasib leh Serchhip district-ah COVID-19 hrik thar a awm ngei tih finfiah a ni tawh a ti a. A vawi 5 nan tunah hian Zoram Medical College-a Microbiology Department chuan sample 500 thawn turin an inbuatsaih mek a, heng sample te hi Aizawl, Lunglei, Kolasib, Champhai leh Serchhip district-a ni an nih thu a sawi a ni.

COVID-19 hri kan inkaichhawn chak dan leh hri kai ten an tawrh nat sawt dan en hian District tinah he hrik thar hi a awm nia ngaih theih a ni a, a finfiah nan hma lak zel a ni ang, a ti a. Mipuite chu fimkhur lehzual turin a ngen a, COVID-19 hri laka invenna tura sawrkarin inkaihhruaina a duante chu uluk taka zawm turin a chah nawn a ni.

Whole Genome Sequencing tura Mizoram atanga sample thawn tawh dan chu hetiang hi a ni :

1. March, 2021 – sample 69 thawn niin variant thar hmuh a ni lo

2. April, 2021 – sample 217 thawn niin Deta Variant 4 hmuh a ni.

3. June, 2021 – sample 100 thawn niin Delta Variant 73, Alpha Variant 1 leh Eta Variant 1 hmuh a ni.

4. July ni 15, 2021 – sample 151 thawn niin Delta Variant 115 hmuh a ni.

Dr. Pachuau Lalmalsawma chuan sample thawnna hmun National Institute of Biomedical Genomics (NIBMG), Kalyani, West Bengal chu India hmarchhak State 8 in kan intawm avangin sample test hian hun a duh rei deuh thin a, result kan hre har deuh thin tih a sawi bawk a ni.

Sawrkarin Lockdown a puan chhunga Mass testing (sample test runpui) an buatsaihah ni 27 chhungin Aizawl district-a khua/veng 67 a sample 91,286 test zingah COVID-19 positive 2591 an hmuhchhuah tawh thu sawiin, hei hi 2.83% a ni a, sample test runpui hi kalpui chhunzawm mek zel a ni, a ti.

Sawrkar hmalakna a hlawhtlinna kan hmu tan tih sawiin positive thar an tlahniam tial tial a, amaherawhchu hei hi kan ziaawm ta hle tihna a nil ova, kan la fimkhur chhunzawm zel a pawimawh a ni, a ti a. COVID-19 Third Wave lo mthleng tur nia an sawi lakah pawh kan inven fimkhur a tul a, a rawn thleng a nih pawha kan tawrh nat lutuk loh nan COVID Appropriate behaviour mitinin kan zawm that tlan a pawimawh hle a ni, a ti.