2781/2026-2027

Chawngte 22nd October, 2026 : Vawiin khan Women & Child Development Director Pi Zoramthangi Chhangte chuan Chawngte ICDS Project hnuaia buatsaih Awareness on Mission Shakti Programme a hmanpui. He hun hi Pu Lal Sangzuala, CDPO chuan kaihruaiin, Pi Juhnee Chakma, President Chakma Mahila Samiti chuan kalkhawmte  inlawmna thu a sawi.

Pi Zoramthangi Chhangte chuan Mission Shakti hnuaia hmeichhe dinhmun chawikanna leh venhimna scheme hrang hrangte sawifiahin, sawrkarin hmeichhia leh naupangte tana scheme tha tak tak a ruahman te chu ngaihvena chhawr tangkai deuh deuh turin kalkhawmte a chah a. Khuallian chuan Chawngte Block - in an mamawh em em hmeichhe harsatna tawkte tlukluhna tur One Stop Centre (OSC) chu sawrkar laipuiin pe turin ruahmanna a siam mek thu a sawi a. One Stop Centre - hman tangkai thiam a tul rualin, mamawh loa awm chu thil tha ber anih thu sasiin, chumi atana tan la turin kalkhawmte a chah nghal bawk.

Pi Flora Laltanpuii, Deputy Director (Women) leh Member Secretary, Mizoram State Commission for Women ni bawk chuan 'The Protection of Women from Domestic Violence Act, 2005' chungchangah zirtirna a pe a. Chawngte Block huamchhunga hmeichhiaten harsatna an tawh nasat thin avangin hmeichhe venhimna dan te chu  hriat ngei ngei a pawimawh a ni, a ti. District leh Block tinah PWDVA, 2005 hnuaia Protection Officer an awm bakah Women Helpline (181) chu engtiklai pawha biak theih an nih thu a sawi a ni. He programme hi State Hub for Empowerment of Women (SHEW), Central Chakma Mahila Samiti leh District Hub for Empowerment of Women (DHEW), Lawngtlai te tangkawpin an buatsaih niin Chakma Mahila Samiti member, Anganwadi Workers, khawtlang hruaitute leh zirna in hrang hranga zirtirtute an tel kim hle.

Pi Zoramthangi Chhangte leh Pi Flora Laltanpuii te chuan Pu Nirupam Chakma, Chief Executive Member, CADC chu a pisa-a kawmna an nei nghal a. Chakma Customary Law Code, 1997 hnuaia Chakma hmeichhia leh naupangte dinhmun chhe lutuk chu ennawn turin an ngen a ni. Ram danpui kalha Chakma hnam danin kumtling lo inneih a phalsak chu tha lo an tih thu leh a rang thei ang bera siam tha (amend) turin an ngen bawk. He hunah hian Pu Lal Sangzuala, CDPO Chawngte, Pi Jyotsna Chakma, District Council Social Welfare Officer leh Pi Juhnee Chakma, President, Chakma Mahila Samiti ten an tawiawm a ni.

CEM nena an inkawm zawhah hian CADC Art & Culture Hall-ah CADC hnuaia Department hrang hranga Officer, Village Council Members leh khawtlang hruaitute nen hmeichhia leh naupangte hmasawnna leh venhimna chungchangah inkawmna  hun hman zui a ni.