2782/2026-2027

Champhai dated the 22nd October, 2026: Vawiin khan Power & Electricity leh Commerce & Industries Department changtu Minister Pu F. Rodingliana chuan Champhai-a Industrial Estate leh Solar Power Plant dinna tura ruahman hmunhma a tlawh.

Minister chuan Bawkmual–Hmunhmeltha rama Megawatt 10 (10 MWp) Solar Power Plant din tura ruahman chu tlawhin, Mizoram sawrkar chuan kawlphetha leh eizawnna kawngah mahni intodelh a ngai pawimawh em em a, State chhung ngeia kawlphetha tam zawk leh mamawh phuhru zo tura tlawm zawka tharchhuah theihna turin Solar Energy Project hrang hrangah chak taka hma lak mek a nih thu a sawi a. Hmunhmeltha-a Industrial Estate hmun leh IIDC Zote hmunhma pawh tlawh chhunzawm nghalin, Industrial Estate hi tualchhung kuthnathawktu leh thiam thil nei tharte tan eizawnna kawng hawnsakna leh hmasawnna thlentu tur pawimawh tak a ni a, hmun pek tawh hma la la lo ten hma an lak thuai theih nan department hotute chu vil zui turin a chah bawk a ni.

Minister hi Dr. H. Lianzela, Secretary, P&E Dept, Pu Lalhmunsanga Hnamte, Director, C&I Dept, Er Lalnunpuii, Director, ZEDA, Er Zothansanga, SE (Works I & II), SE, Champhai Power Circle leh DCIO, Champhai ten a tawiawm a ni