2783/2026-2027

Dated Aizawl, the 22 October 2026: Vawiin khan Mizo Zaimi Inzawm khawm General Conference 2026 Zan khatna (Palai Lawmna Inkhawm) chu I&PR Auditorium, Treasury Square-ah neih a ni a. Pi Mina Zoliani Joute, Director, I&PR chuan he hun hi khuallian niin a hmanpui

He hunah hian khuallian Pi Mina Zoliani Joute, Director, I&PR chuan thusawiin, Mizorama Zaimite Pawl lian ber pakhat MZI-in Khawmpui hun hlu tak a thleng leh thei chu lawmawm a tih thu a sawi a. MZI chu pawl hlun leh zahawm, a chhung a mite pawh mipui vantlang en rawn leh en tawn an nih avangin a ngaihhlutawm hle tih sawiin, chumi hre reng chuan pawl mite pawh mite entawn tlak leh a tha lama mipui vantlang tihhmuhtu nih tum zel turin a chah a. Kumin Khawmpui thupui, 'rimawi kal tlangah inpumkhatna' chu kawng tam taka lo tihlawhtling tawh tute an nih angin, hnam nunphung chawisan, inpumkhatna tura hma lak leh ruihhlo do bakah tanpui ngaite tanpui thleng pawhin MZI member-te chu hmahruaitu ni chhunzawm zel turin a chah a. Kalkhawmte chu mahni zawn theuhvah hmasawn zel tur leh an talent dawn te tipung zel tura chahin, Khawmpui chu hlim leh hlawhtling taka hmang theuh turin duhsakna a hlan nghal bawk a ni.

MZI Khawmpui 2026 zan khatna, Palai Lawmna Inkhawm  hi Pu  Peter C. Lalrinmawia, Vice President MZI Gen Hqrs chuan kaihruaiin, Pu Rosiamngheta, President, MZI Gen Hqrs  chuan Palaite a lo lawm a. Abraham M Ralte, Asst General Secretary, MZI Gen. Hqrs. kaihhruaiin MZI Member boral tate sunna hun hman a ni a. District Headquarters hrang hrang atangin Headquarters hmalakna leh hmachhawpte report ngaiththlak nghal a ni a. MZI khawmpui tun tuma neihah hian General Headquarters hruaitu thar pawh an thlang nghal dawn a ni.