331/2025-2026

Dated Aizawl: the 24th April 2025 : Vawiin chawhnu dar 1:00 khan, Directorate of Women & Child Development buatsaihin, Poshan Pakhwada-2025 kharna hun chu AMC huamchhunga Local Council hruatute nen Vaivakawn Cultural Centre cum Auditorium-ah hman a ni a. He hun hi Social Welfare, Women & Child Development Department changtu Pi Lalrinpuii chuan khuallian niin a hmanpui.

He hunah hian khuallian Minister Pi Lalrinpuii chuan kalkhawmte hmaah thu sawiin, Women&Child Development Department chu sawrkar pawhin a ngaihpawimawh hle tih a sawi a. Poshan Pakhwada hnuaia Department hmalakna kaltlanga Ei leh in hrisel leh chaw khawpkham loh pawi theihzia inzirtirnate chu naupang than chhohna kawnga nu leh pate hriattur pawimawh tak a nih thu tarlangin, Niti Ayog pawhin naupangte zinga thau lutuk tam te chu a ngaimawhin, chumi lamah tan lak theih dan tur kawng ngaihtuah chu thil hmanhmawhthlak tak nia a hriat thu a sawi a. Hei bakah hian tunlaiin naupangte zingah phone en nasat lutuk avanga autism a hluar nia langte chu ngaimawawm hlea a hriat thu sawiin, nu leh pa ten nasa leh zuala ngaihtuahna kan sen a tul hle a ni a ti a. Ei leh in thuahte pawh, kan ram leilung thar chhuah ngei chawi lar zawnga Department hmalaknate chu uar sauh sauh zel tlak ni a a hriat thu sawiin. Hnam hrisel tak ni zel thei tur leh chhuan lo la awm tur chena ro tling hnutchhiah thei tura thawhpuiah kalkhawmte chu a sawm nghal bawk a ni.

Vawiina hun hman hi Pu Lalnunhlua, Addl. Secretary, Women & Child Development chuan kaihruaiin, kalkhawmte lo lawmna thu a sawi a. Pi Zoramthangi Chhangte Director, Women & Child Development chuan ICDS leh Anganwadi chungchanga khawtlang mipuite nena tanrual pawimawhna leh chumi lamah Department-in hlawhtlinna a taka an hmuh tawhte presentation a pe a. Hemi zawh hian Poshan Pakhwada-2025 hman dan Video Clip nen thlirhona neih a ni  a. Pi Zonunpari Sailo Joint Director, Women & Child Development chuan lawmthu sawiin hun hi a khar a ni.