332/2025-2026
Aizawl dated 25th April 2025: Vawiin khan Dawrpui Multipurpose Centre-ah ‘Malaria Ends with Us: Reinvest, Reimagine, Reignite’ tih thupui hmangin ‘World Malaria Day 2025’ pual a hun hman a ni a. Health & Family Welfare Department Minister Pi Lalrinpuii chu khuallian niin Dr. Lalthlengliani, Principal Director chuan hun a kaihruai a. Malaria kaihhnawih a Mizoram dinhmun thlir hona hun te hman niin Malaria hluarna hmun a khawtlang hruaitute atangin an harsatna leh hmalaknate ngaihthlak a ni.
Minister Pi Lalrinpuii chuan Mizoramah kum 2023 chhung khan Malaria vei hmuhchhuah mi 18,005 atanga mi 13 laiin nunna an chan thu leh kum 2024-ah Malaria vei hmuhchhuah mi 16,899 atanga mi 7-in nunna hlu tak an chan thu a sawi a. India ram State dang nen khaikhinin Mizoram chu Malaria vei tamna ber State kan nih mek avangin Malaria um bo tur hian Sawrkar, tlawmngai pawl leh khawtlang thawhhona a pawimawh takzet thu a sawi a. Sawrkar ruahmanna a, a thlawn a thisen endik te, Malaria veite tan a damdawi te, a hun tak a kan in leh a vel thosi hlo (Indoor Residual Spray) a kah te, damdawi hmang a thosi len chiah leh Thosilen damdawia chiah sa (LLIN – Long Lasting Insecticidal Treated Nets) kan dawn te, tangkai tak a hman a tul thu a sawi.
Health Minister chuan World Malaria Day 2025 thupui ang hian Malaria natna um bo tur hian tan lak thar a pawimawh thu sawiin, Mizoram hi Malaria awm lohna hmun a puan vat a nih ngei theih nan theihtawp chhuah theuh turin kalkhawmte a fuih a. Kan ram leh khawtlangin hriselna kawngah hmasawnna nasa zawk a hmuh theih nan Health Department-a thawktute tha tichak tura thawkchhuak thin turin leh, faina leh thianghlimna ngai pawimawh turin kalkhawmte a fuih bawk a ni.
World Malaria Day 2025 pual a hun hmanna ah hian Dr. Chawngthanchhunga, Additional Director, State Program Officer (VBD) ni bawk chuan Malaria chungchanga Mizoram dinhmun tarlanna hun a hmang a. Dr. Hmingthanmawii, Director of Health Services chuan lawmthu sawina hun a hmang bawk a ni.
He hun a tarlan danin Mizoram chu Annual Parasite Incidence (API), thisen 1000 endik atanga Malaria vei hmuhchhuah zat enin Category III ah a awm mek a. Kum 2024 khan 13.24 API a ni a, Lawngtlai, Lunglei, Mamit leh Siaha district-ahte hian Malaria vei hmuhchhuah an thahnem hle a ni. Kum 2024 a Malaria vei hmuhchhuah 16899 atanga mi 8950 chu Malaria Pf vei an ni a, 7943 chu Malaria Pv an ni. Mizoram chhung a khaw 967 atanga khaw 463-te chu API 0 anga chhinchhiah an ni a, Malaria vei awm lohna khua tihna a ni.
