333/2025-2026
Dated Serchhip, the 25th April, 2025: Mizoram Sawrkar chuan sawhthing lei a kalpui chhunzawm mek a. Tun dinhmunah thuang hniha kalpuiin sawrkarin cheng 50 zela a leisak bakah auction kalpui reng a ni bawk a. Vawiin khan Serchhip DAMC chuan an hnuaia Secondary Collection Centre (SCC) hruaitute ko khawmin DC Meeting Hall-ah sawhthing hralh kawnga an dinhmun mek leh hmachhawp te, harsatna an tawh dan te an sawipui a ni.
DC Pu Paul L Khuma chuan sawrkarin Mizoram tan hmathlir a nei a, sawhthing chingtute sum lakluh a pun theihna turin marketing lamah tanpui a tum a, chu a hmathlir tihhlawhtlinna tur chuan mawhphurhna neitu zawng zawngin pheikai rual a kan tihtur kan helnchhuah theuh a tul a ni, a ti a. Vawiin meeting neih chhan sawiin sawhthing lei leh hralh kalpui danah SCC te dinhmun a inang lo a, thenkhat an thiam em em laiin thenkhat la hrethiam tawk lo deuh te an awm avang leh harsatna an tawh dan te a inan loh avanga sawihona hun buatsaih a nih thu DAMC Chairman chuan a sawi a ni.
Serchhip District chhunga SCC tin atangin Chairman, Secretary leh Manager te an kal khawm a. An hriat thiam loh te inhrilhfiahna hun te, an harsatna tawh chinfel dan kawng te kawhhmuh an ni a. SCC tin te hi mahni ke a ding tur leh auction te pawh anmahniin ti chhuak a, a leitu tur pawh ngaihven tura beisei an nih laiin anmahni viltu Supervisor leh Co-ordinator te pawh englai pawha an rawn reng theih thu inhrilhriat thar leh a ni a. Hralhna kawngah harsatna an tawk a nih chuan DAMC Auction Team ten an tanpui theih thu an hrilh bawk a ni.
Dr C.Vanlalchhanhimi, SDC chuan powerpoint hmangin sawhthing lakkhawm leh hralh dan tur kimchang a chin chhuakin a sawifiah a. Vawiin meeting-ah hian Additional DC Pu Lalrinzuala, sawrkar official dang te leh SCC hotute an tel a ni.
