334/2025-2026

Aizawl, the 25th April, 2025:  Mizoram Larsap, General (Dr) Vijay Kumar Singh, PVSM, AVSM, YSM (Retd), Chief Rector of Mizoram University ni bawk chuan vawiin khan Mizoram University (MZU) dinchamphaphak lawmna leh Silver Jubilee lawm bultana, MZU Auditorium-a neih chu Khuallian niin a hmanpui a, Silver Jubilee Logo a tlangzarh bawk. He hunah hian Ambassador (Retd) Pu Gurjit Singh chu Khualzahawm a ni. 

Larsap General (Dr) Vijay Kumar Singh (Retd) chuan MZU in kum 25-na hmel a hmu chu lawmawm tiin, MZU hnuaia zirtirtu, thawktu leh zirlai awm tawh zawng zawngte chu hemi thleng tura mi pawimawh takte an ni, a ti a. Mizoram Larsap dinhmun a chelh atanga hun reilote chhunga MZU hmasawnna chak tak leh hlawhtlinna hrang hrangte a lo hriat thu sawiin, MZU chu Mizoram mai bakah North East-a zirna sang zawk tihhmasawn kawnga zirna in pawimawh a ni, a ti a. Zirna tihhmasawn nana hmanraw tha ber ber leh tunlai ber bera thuam a nih thu leh university campus hmun mawi leh nuam, lehkha zir nana duhawm tak nei a ni tih sawiin, hengte hian MZU chu thiam zirna hmun pawimawh bikah a siam a ni, a ti bawk.

Mizoram Larsap chuan tunhnaia MZU hlawhtlinna hrang hrangte tarlangin, NAAC Accredited 'A' Grade pek a ni leh, NIRF Ranking-ah kum 2016 atangin India rama Higher Education Institution tha zual thlan chhuah 100 zinga a tel ziahte, India Today Ranking-in India ram University tha zual thlan chhuah 30 zinga a telh leh North East India-a Central University 8 zinga 2-na dinhmun a hauh phate, research paper 2,234 leh lehkhabu 868 tihchhuah a ni tawhte chu lawmawm a tih thu a sawi a. Zirtirtu 1 in naupang 10 zel vil anga chhut a nite, zirtirtu za zela 90 PhD nei an ni leh teaching post za zela 94 lai mai hnawhkhah a ni thei chu chhuanawm a tih thu a sawi a. A awmnain a zir em avangin MZU chu Act East Policy tihhlawhtlin kawngah pawh a pawimawh dawn thu sawiin, South East Asian ramte nena inlaichinna tihchak zelna kawngah leh, thenawm ramte nena zirna leh hnam ziarangte inhriatpawhtawnna tura hmalaknaah MZU chu a la tangkai dawn thu a sawi bawk. 

Khualzahawm Ambassador (Retd) Pu Gurjit Singh chuan Mizoram tlawha MZU din champha leh silver jubilee lawmna hun hmang theia a awm chu lawmawm a tih thu a sawi a. Sawrkar laipui scheme pawimawh tak, Act East Policy chungchanga hriattur pawimawhte sawifiahin, hemi kawngah hian Mizoram chuan dinhmun pawimawh tak a chelh thu a sawi bawk. 

He hunah hian MZU Vice Chancellor Prof. D.C. Deka chuan inlawmna thu sawiin, Prof. Lalnuntluanga, Controller of Examination & Convenor of Programme Committee-in Silver Jubilee lawm dan tur programme duante a sawifiah a. Larsap kaihhruaiin Pope Francis leh firfiakte chetna avanga Pahalgam-a nunna chante sunna hun tawi hman a ni a. Silver jubilee logo insiamsiak lawmman sem niin, MZU chanchin tarlanna silde show thlir ho a ni bawk a. MZU Registrar Prof. Lalnundanga'n lawmthu sawiin hun hman a khar a ni. 

MZU Silver Jubilee lawmna programme hi vawiin atanga nakum April ni 25 thleng neih tur niin, hemi hun chhung hian seminar, exhibition hrang hrang, awareness campaign, thingphun hnatlang, SARAS fair, blood donation camp, free health camp, music festival, faina hnatlang, mock drill leh adangte neih tum a ni. 

Mizoram University hi kum 2001 ah din niin, tun dinhmunah Department 37 a nei a. Centre 8 te'n School of Study 10 ah UG, PG leh Ph.D programme an kalpui mek a. Affiliated College 40 leh Constituent College 1 a nei mek a. State 20 chuang atangin zirlai an awm bakah, foreign student 100 vel an awm mek a ni.

Full Speech of Governor:https://dipr.mizoram.gov.in/post/speech-of-general-dr-vijay-kumar-singh-pvsm-avsm-ysm-retd-honble-govenor-of-mizoram-on-the-occasion-of-inauguration-of-year-long-silver-jubilee-celebrations-of-mizoram-university-on-25th-april-2025-at-mzu-campus-tanhril